ИСТИФОДАИ САМАРАНОКИ ЗАМИН. Дар заминҳои кишоварзӣ яхҷуфт идома дорад

ДУШАНБЕ, 06.01.2026 /АМИТ «Ховар»/. Дар айни замон дар мамлакат кишоварзон дар заминҳои кишт яхҷуфт мегузаронанд. Яхҷуфт асосан дар нимаи дуюми шаб гузаронида шуда, онро шудгори шабона низ мегӯянд. Чунин иброз намуд директори Институти боғу токпарварӣ ва сабзавоткории Академияи илмҳои кишоварзии Тоҷикистон Шарофиддин Кароматов ба АМИТ «Ховар».

Ба иттилои Агентии обуҳавошиносии мамлакат, то 10 январ ҳарорат шабона паст ва рӯзона баланд мешавад. Дар робита ба пешгӯи обуҳавошиносон, олимони соҳа тавсия медиҳанд, ки шудгор бояд дар нимаи дуюми шаб гузаронида шавад. Зеро дар ҳарорати пасти ҳаво қисми болои замин ях мекунад.  Барои шудгори шабона техникаи тасмачарх истифода бурда мешавад.

Дар фасли зимистон шудгор ва яхоб мондан манфиати зиёд дорад.  Тавассути он ҳашароти зараррасон ва бемориҳо нобуд мегарданд.

Ба иттилои кишоварзон, шудгоркунӣ ва яхобмонӣ маъракаи муҳим барои кишоварзон мебошанд. Зеро ҳангоми шудгор хок омезиш ёфта, тухми алафҳои бегона, зараррасону барангезандагони бемориҳои зироати хушк ба зери хок афтида, нобуд мегарданд. Дар қабати поёнии шудгор бо таъсири намии дубора ва микрофлораи фаъоли муфиди хок моддаҳои ғизоии барои растанӣ зарурӣ зиёд мешаванд.

Шудгори замин вобаста ба зироат гузаронида мешавад. Яъне, барои пунбадона чуқурии он зиёда 40 сантиметрро бояд ташкил диҳад. Ҳамчунин дар вақти шудгор додани пору ба замин ҳатмӣ мебошад.

Ба тавсияи мутахассисони соҳа, шудгори барвақтӣ, ки дар фасли тирамоҳ гузаронида мешавад, барои ҳосили фаровон замина мегардад. Зеро замин як муддат дам гирифта, мулоим мешавад, инчунин дар сардии ҳаво алафҳои бегона нобуд шуда, дар натиҷа ҳосили фаровон ба даст меояд. Агар шудгор босифат гузаронида шавад, яъне хок хуб майда шуда, пору ва алафҳои бегона зери хок гардонида шаванд, дар ин ҳолат тухми алафҳои бегонаю ҳашароти зараррасон ва барангезандаи касалиҳо кам ва ё пурра нест шуда, дар  ин гуна замин ҳосил  фаровон мегардад.

АКС: АМИТ «Ховар»