Беҳтаринҳои Лигаи футзали Тоҷикистон дар мавсими 2025 муайян шуданд

ДУШАНБЕ, 13.02.2026 /АМИТ «Ховар»/. Дар шаҳри Душанбе маросими ҷамъбасти мавсими футзал-2025 баргузор шуд. Дар он фаъолияти Суперлигаи Тоҷикистон натиҷагирӣ гардида, беҳтарин бозигарон, мураббиён ва ғолибони ҷоизаҳои инфиродӣ муайян карда шуданд.

Тавре ба АМИТ «Ховар» аз Федератсияи футболи Тоҷикистон иттилоъ доданд, ҷоизаи асосии мавсим ба капитани дастаи «Сипар»-и Хуҷанд Иқбол Воситзода тақдим гардид, ки беҳтарин бозигари Суперлига-2025 номида шуд.

Унвони беҳтарин мураббиро Пайрав Воҳидов соҳиб шуд, ки таҳти роҳбарии ӯ «Соро компания» дар Суперлигаи Тоҷикистон ва Суперҷом ғолиб омад.

Ғолибон дар дигар категорияҳои инфиродӣ низ дар ин маросим эълон шуданд.

Ғайр аз ин дастаи рамзии Суперлигаи Тоҷикистон-2025 муаррифӣ карда шуд. Сарпарастон, шарикон ва онҳое, ки дар рушд ва оммавияти футзал дар мамлакат саҳми назаррас гузоштаанд, бо ҷоиза ва сипосномаҳо қадрдонӣ шуданд.

АКС: Федератсияи футбол Тоҷикистон