Дар Тоҷикистон то 5 феврал ҳавои тағйирёбанда пешгӯӣ мешавад

ДУШАНБЕ, 02.02.2026 /АМИТ «Ховар»/. Аз 3 то 5 феврал дар мамлакат ҳавои тағйирёбанда шуда, 6 феврал бориши борон ва барф пешгӯӣ карда мешавад. Дар ин хусус АМИТ «Ховар» бо истинод ба Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон  хабар медиҳад.

Дар ин рӯзҳо бо сабаби бориши эҳтимолии барф ва тағйирёбии ҳарорати ҳаво дар минтақаҳои тармафарои шоҳроҳи нақлиётгарди Душанбе–Чанок (километрҳои 48–74), аз ҷумла минтақаҳои тармафарои Майхура, Зиддеҳи ноҳияи Варзоб, ҳамчунин дар ноҳияҳои кӯҳии тобеи ҷумҳурӣ фаромадани тарма дар назар аст.

Дар вилояти Хатлон 4-5 ва 7 феврал ҳавои бебориш пешгӯӣ шуда, 6 феврал дар баъзе ноҳияҳо бориши борон ва  барф дар назар аст. Дар ноҳияҳои алоҳида туман мефарояд. Ҳаво дар водиҳо шабона 4+9 дараҷа гарм, рӯзона 13+18 дараҷа гарм ва 6 феврал ҳарорати ҳаво паст шуда, то 1+6 дараҷа гарм мешавад. Дар ноҳияҳои доманакӯҳӣ шабона 0+5 дараҷа гарм, рӯзона 5+10 дараҷа гарм ва  6 феврал ҳарорати ҳаво паст шуда, аз 1 дараҷа хунук то 4 дараҷа гармӣ дар назар аст.

4 ва 5 феврал дар вилояти Суғд ҳавои бебориш пешгӯӣ шуда, 6-7 феврал дар баъзе ноҳияҳо бориши борон ва барф дар назар аст.  Дар ноҳияҳои алоҳида туман мефарояд. Ҳаво дар водиҳо шабона 1+6 дараҷа гарм, 6-7 феврал ҳарорати ҳаво паст шуда, аз 2 дараҷа хунук то 3 дараҷа гарм, рӯзона 8+13 дараҷа гарм, 6 феврал ҳарорати ҳаво паст шуда, то 0+5 дараҷа гармӣ пешгӯӣ мешавад. Дар ноҳияҳои кӯҳӣ шабона 5-10 дараҷа хунук, 5-6 феврал 0-5 дараҷа хунук, рӯзона 2+7 дараҷа гарм, 6-7 феврал ҳарорати ҳаво паст шуда, аз 3 дараҷа хунук то 2 дараҷа гарм мешавад.

Дар ноҳияҳои тобеи ҷумҳурӣ ҳавои тағйирёбандаи бебориш пешгӯӣ шуда, 6 феврал ва шабонаи 7 феврал бориши борон ва барф дар назар аст.  Дар ноҳияҳои алоҳида туман мефарояд. Шамол аз самти ғарб бо суръати 5-10 метр дар як сония мевазад. Ҳаво дар водиҳо шабона 0+5 дараҷа гарм, 5 феврал ҳарорати ҳаво баланд шуда, то 5+10 дараҷа гарм, рӯзона 12+17 дараҷа гарм, 6 феврал ҳарорати ҳаво паст шуда, то 2+7 дараҷа гарм, дар ноҳияҳои кӯҳӣ шабона аз 4 дараҷа хунук то 1 дараҷа гарм, рӯзона 2+7 дараҷа гарм мешавад.

Дар баъзе ноҳияҳои Вилояти Мухтори Кӯҳистони Бадахшон  ҳавои тағйирёбандаи бебориш пешгӯӣ шуда, 6 феврал бориши борон ва барф дар назар аст. Ҳаво дар ғарби вилоят шабона 4-9 дараҷа хунук, рӯзона 0+5 дараҷа гарм, дар шарқи вилоят шабона 20-25 дараҷа хунук ва рӯзона 4-9 дараҷа хунук мешавад.

АКС: АМИТ «Ховар»