ФУТБОЛ. 5 феврал қуръакашии тақвими чемпионати Тоҷикистон-2026 баргузор мешавад

ДУШАНБЕ, 04.02.2026 /АМИТ «Ховар»/. 5 феврал дар шаҳри Душанбе қуръакашии бозиҳои чемпионати Тоҷикистон-2026 байни дастаҳои Лигаи олӣ оид ба футбол баргузор мешавад.

Тавре ба АМИТ «Ховар» аз Федератсияи футболи Тоҷикистон хабар доданд, дар чемпионати 35-уми Тоҷикистон дувоздаҳ бошгоҳ– «Истиқлол», КМВА (ҳарду аз Душанбе), «Вахш» (Бохтар), «Равшан» (Кӯлоб), «Хуҷанд», «Эсхата» (ҳарду аз Хуҷанд), «Ҳосилот» (Фархор), «Регар-ТадАЗ», «Сардор» (ҳарду аз Турсунзода), «Барқчӣ» (Ҳисор), «Истаравшан» (Истаравшан) ва «Парвоз» (Фурудгоҳи байналмилалии Хуҷанд) иштирок мекунанд.

Мавсими нав дар ду марҳила баргузор шуда, ҳар даста бо ҳар рақиб ҳам дар хона ва ҳам дар сафар бозӣ мекунад. Дар натиҷа ҳар бошгоҳ дар доираи чемпионат 22 бозӣ анҷом медиҳад.

Дастае, ки дар Лигаи олии Тоҷикистон-2026 ҷойи охиринро мегирад, ба Лигаи якум мефарояд. Бошгоҳе, ки зинаи ёздаҳумро ишғол менамояд, бо дастаи дуюми Лигаи якуми Тоҷикистон-2026 бозиҳои гузаришӣ доир мекунад.

Оғози мавсими нави Лигаи олии Тоҷикистон 6 март ба нақша гирифта шудааст.

АКС: Федератсияи футболи Тоҷикистон