35-СОЛАГИИ ИСТИҚЛОЛИ ДАВЛАТӢ. Дар шаҳри Турсунзода муассисаҳои таълимӣ, кӯдакистони хусусӣ ва толорҳои варзишӣ бунёд карда мешаванд

ДУШАНБЕ, 29.04.2026. /АМИТ «Ховар»/. Бахшида ба 35-солагии Истиқлолияти давлатӣ дар шаҳри Турсунзода чанд иншооти ҷашнӣ мавриди истифода қарор дода шуд. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Турсунзода хабар доданд.

Аз ҷумла, ба ифтихори 35-солагии Истиқлолияти давлатӣ дар Ҷамоати деҳоти «10-солагии Истиқлолият» иншооти ҷашнӣ ба истифода дода шуда, сохтмону навсозии муассисаҳои таълимии №16, 111, 42, 48, кӯдакистони хусусӣ ва толорҳои варзишӣ босуръат идома дорад.

Ҳамчунин сохтмони Муассисаи таҳсилоти миёнаи умумии №66 дар Ҷамоати деҳоти Работи шаҳри Турсунзода идома дорад.

Тибқи нақша, муассисаи мазкур бо тамоми шароити муосири таълим таъмин мегардад. Иншоот то ҷашни 35-солагии Истиқлоли давлатӣ ба истифода дода мешавад.

Дар доираи тадбирҳои судманд дар деҳаи Кадучии Ҷамоати деҳоти Работи шаҳри Турсунзода Маркази савдо ва хизматрасонӣ ба истифода дода шуд.

Инчунин дар деҳаи Лолазори Ҷамоати деҳоти «10-солагии Истиқлолият»  хонаи доругузаронӣ сохта шуд. Ин амал ба расонидани кумаки аввалини тиббии саривақтӣ мусоидат менамояд.

Дар доираи ҳамин созандагию бунёдкорӣ ба тариқи ҳашар аз ҷониби сокинони деҳаи дурдасти кӯҳистони Навобод дар Ҷамоати деҳоти Регари шаҳри Турсунзода об бароварда мешавад.

Раиси шаҳри Турсунзода Парвиз Акрамзода дар маросими ифтитоҳи иншооти ҷашнӣ иштирок намуда, бо рафти корҳои сохтмонӣ дар дигар иншооти ҷашнӣ шинос шуд.

Чунин тадбирҳои созанда дар доираи сиёсати бунёдкоронаи Ҳукумати мамлакат амалӣ гардида, ба баланд бардоштани сатҳи зиндагии сокинон ва рушди устувори минтақа мусоидат менамоянд.

АКС: Мақомоти иҷроияи ҳокимияти давлатии шаҳри Турсунзода