Ҷавонони шаҳри Турсунзода бо дуои неки модарон ба сафи Артиши миллӣ пайвастанд

ТУРСУНЗОДА, 02.04.2026 /АМИТ «Ховар»/. Дар майдони Комиссариати ҳарбии  шаҳри Турсунзода Рӯзи даъватшаванда баргузор шуд. Зимни он ҷавонони даъватшавандаи шаҳр бо анъанаи «Кулчагазон»-у дуои неки модарон ба сафи Қувваҳои Мусаллаҳи Ҷумҳурии Тоҷикистон равона гардиданд. Дар ин хусус ба хабарнигори минтақавии АМИТ «Ховар»  Субҳониддини Маҳмуд аз Мақомоти иҷроияи ҳокимияти давлатии шаҳри Турсунзода иттилоъ доданд.

Раиси шаҳри Турсунзода Парвиз Акрамзода зимни  ҳамоиш изҳор намуд, ки «имрӯз ҷавонони бономус барои адои қарзи фарзандӣ дар назди Ватан – Модар ҷамъ омада, азм намудаанд, ки ба Ватан  содиқона хизмат кунанд. Мардуми сарбаланди Тоҷикистон дар симои сарбозони ҷасури Ватан ҳомиёни сулҳу оромии сарзамини аҷдодиро мебинанд ва бо шукргузорӣ аз фазои сулҳу оромии давлат барои рушду ободии он дар ҷабҳаҳои гуногун софдилона заҳмат менамоянд».

Раиси шаҳр  оид ба масъулиятшиносӣ ва ташаббуси ватанпарастона, ҳувияти баланди миллӣ, матонату ҷавонмардии даъватшавандагон сухан ронда, ба волидайнашон изҳори миннатдорӣ намуд.

Дар ҳамоиш  ба 155  нафаре, ки даври омӯзиши ронандагии Ташкилоти ҷамъиятии «Мададгори мудофиа» – ро хатм намуда, барои ба сафи Артиши миллӣ дохил шудан ихтиёрӣ ариза навишта буданд, шаҳодатномаи ронандагӣ супорида шуд.

Волидайни   даъватшавандагон иброз доштанд, ки “ҳифзи оромиву осоиштагии сарзамини муқаддас қарзи шаҳрвандии ҳар ҷавонмард буда, Артиши миллӣ мактаби бузурги тарбияи ирода, ҷасорат ва шуҷоат ба ҳисоб меравад. Аз ин рӯ мо, модарон  бояд фарзандонро дар руҳияи ватандӯстӣ тарбия намуда, бо ифтихори баланд ба сафи Артиши миллӣ гусел намоем”.

АКС: Мақомоти иҷроияи ҳокимияти давлатии шаҳри Турсунзода