Дар шаҳри Хоруғ даври вилоятии мусобиқаи «Ватанпарвар» баргузор гардид

 ДУШАНБЕ, 23.04.2026. /АМИТ «Ховар»/. Дар шаҳри Хоруғи Вилояти Мухтори Кӯҳистони Бадахшон байни хонандагони муассисаҳои таҳсилоти миёнаи умумӣ даври вилоятии Мусобиқаи ҳарбию варзишии «Ватанпарвар» баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Хоруғ иттилоъ доданд.

Дар даври вилоятии мусобиқа ҷойи аввалро дастаи шаҳри Хоруғ, ҷойи дуюмро дастаи Рӯшон ва зинаи сеюмро дастаи Роштқалъа соҳиб шуданд. Ғолибон бо Ифтихорнома ва мукофоти пулӣ сарфароз гардонида шуданд.

Ҳадафи мусобиқаи ҳарбию варзишӣ боз ҳам баланд бардоштани руҳияи ватандӯстию хештаншиносӣ, обутоби руҳию ҷисмонӣ ва дар оянда ба хизмати Ватан омода кардани наврасон мебошад. Таҷриба нишон дод, ки он хонандагоне, ки дар чунин мусобиқаҳо иштирок мекунанд, ҳангоми хизмати аскарӣ ба  мушкилии ҷисмонию  равонӣ дучор намегарданд.

Наврасон аз рӯйи намудҳои тирпаронӣ, ҷудо ва пайваст кардани силоҳ, ба рӯ кашидани ниқоби газӣ, бандкашӣ, дастхобонӣ, таҳия ва шарҳи рӯзномаи деворӣ бо ҳам рақобат карданд.

АКС: Мақомоти иҷроияи ҳокимияти давлатии шаҳри Хоруғ