Дастпарварони Клуби марказии варзишии «Артиш» дар мусобиқаи байналмилалӣ соҳиби 11 медал шуданд

ДУШАНБЕ, 28.04.2026. /АМИТ «Ховар»/.  Дар Ҷумҳурии Қазоқистон байни  хизматчиёни ҳарбии кишварҳои аъзои Иттиҳоди Давлатҳои Мустақил Мусобиқаи байналмилалӣ аз намуди гӯштини самбо ва кураши қазоқӣ баргузор гардид. Дар ин мусобиқа аз Тоҷикистон 11 дастпарвари Клуби марказии варзишии «Артиш» – и Вазорати мудофиаи Ҷумҳурии Тоҷикистон иштирок намуданд.

Тавре ба АМИТ «Ховар» аз ин вазорат хабар доданд, дар ин мусобиқаи байналмилалӣ варзишгарони тоҷик соҳиби 11 медал, аз ҷумла 1 медали тилло, 2 нуқра ва 8 медали биринҷӣ шуданд.

Мусобиқа дар доираи Спартакиадаи 17-уми кишварҳои дӯст доир шуд. Дар он 70 варзишгар аз Тоҷикистон, Қазоқистон, Қирғизистон, Узбекистон, Беларус ва Федератсияи Русия иштирок намуданд.

Ҳадафи мусобиқа таҳким бахшидани равобити дӯстӣ ва баланд бардоштани маҳорати варзишӣ байни хизматчиёни низомии мамлакатҳои дӯст арзёбӣ гардид.

Ёдовар мешавем, ки дар назди Вазорати мудофиаи Ҷумҳурии Тоҷикистон Клуби марказии варзишии «Артиш» фаъолият мекунад, ки дар он афсарону сарбозон машқу тамрин менамоянд. Онҳо дар мусобиқаҳои дохилию байналмилалӣ иштирок намуда, Парчами давлатро чандин маротиба боло бардоштаанд.

Чанде пеш дар назди клуб  се дастаи нави футбол: Клуби варзишии Артиши «Хатлон», «Суғд» ва  «Қувваҳои ҳарбӣ-ҳавоӣ ва мудофиаи зиддиҳавоӣ» таъсис дода шуд. Дар ин дастаҳо на танҳо афсарону варзишгарон, балки сарбозони қисмҳои низомии Вазорати мудофиаи Тоҷикистон низ метавонанд бозӣ кунанд.

АКС: Вазорати мудофиаи Ҷумҳурии Тоҷикистон