Бахшида ба Рӯзи ҷаҳонии футбол дар ноҳияи Шоҳмансур Фестивали варзишӣ баргузор гардид

Май 21, 2026 15:19

ДУШАНБЕ, 21.05.2026 /АМИТ «Ховар»/. Бо ташаббуси Кумитаи иҷроияи Ҳизби Халқии Демократии Тоҷикистон дар ноҳияи Шоҳмансур бахшида ба Рӯзи ҷаҳонии футбол дар майдончаи варзишии «Мирзобек»-и маҳаллаи Гулободи ноҳияи Шоҳмансур Фестивали варзишӣ таҳти унвони «Football Fest» баргузор гардид. Дар ин хусус ба АМИТ «Ховар» аз Кумитаи иҷроияи Ҳизби Халқии Демократии Тоҷикистон дар ноҳияи Шоҳмансур хабар доданд.

Фестивал бо мақсади тарғиби тарзи ҳаёти солим, рушди фарҳанги варзишӣ, таҳкими дӯстиву ҳамдигарфаҳмӣ, ҷалби ҷавонону наврасон ба варзиш ва оммавигардонии бозии футбол байни аҳолӣ гузаронида шуд.

Зимни баргузории фестивал дастовардҳои соҳаи футбол ва дигар намудҳои варзиш ба намоиш гузошта шуда, меҳмонон ва иштирокчиён бо имконияту шароити фароҳамгардида барои рушди футбол дар ноҳия аз наздик шинос гардиданд.

Дар доираи баргузории фестивали мазкур, инчунин маросими ҷамъбаст ва қадрдонии ғолибони мусобиқаи варзишӣ оид ба футболи хурд байни занону духтарони кумита ва ташкилотҳои ибтидоии ҳизбии ноҳияи Шоҳмансур, ки бо ташаббуси Кумитаи иҷроияи ноҳиявии ҳизб бахшида ба Рӯзи ҷаҳонии футбол доир гардид, баргузор шуд.

Зимни маросими тантанавӣ ғолибону иштирокчиёни фаъоли мусобиқа бо медал, Ҷом, Диплом ва туҳфаҳои хотиравии омоданамудаи кумитаи тадорукоти чорабинӣ сарфароз гардонида шуданд.

Таъкид гардид, ки ҷалби занону духтарон ба варзиш, махсусан футбол, яке аз самтҳои муҳими сиёсати иҷтимоии давлату Ҳукумати мамлакат ба ҳисоб рафта, барои таҳкими саломатии ҷомеа ва баланд бардоштани фаъолнокии иҷтимоии бонувон мусоидат менамояд.

Иштирокчиён баргузории чунин чорабиниҳоро дар самти рушди варзиш, аз ҷумла дар самти футбол, тарбияи ҷавонон дар руҳияи солим, таҳкими дӯстиву ҳамбастагӣ ва баланд бардоштани мақоми футбол миёни ҷомеа муҳим арзёбӣ намуданд.

Ёддовар мешавем, ки 7-уми майи соли 2024 Маҷмааи Умумии Созмони Милали Муттаҳид дар асоси пешниҳод ва ташаббуси варзишпарваронаи Президенти Ассотсиатсияи футболи Осиёи Марказӣ (CAFA), Президенти Федератсияи футболи Тоҷикистон ва Раиси шаҳри Душанбе муҳтарам Рустами Эмомалӣ Қатъномаи махсусро оид ба эълон намудани 25-уми май ҳамчун Рӯзи ҷаҳонии футбол қабул намуд.

Ин иқдом аҳаммияти ҷаҳонии футболро ҳамчун воситаи таҳкими дӯстӣ, ҳамбастагӣ ва рушди ҳамкории варзишӣ байни давлатҳо бори дигар ба таври расмӣ таъкид менамояд.