Дар Ню-Йорк ба ифтихори Рӯзи ҷаҳонии футбол мусобиқаи варзишӣ баргузор гардид

ДУШАНБЕ, 21.05.2026 /АМИТ «Ховар»/. Дар қароргоҳи Созмони Милали Муттаҳид дар шаҳри Ню Йорк бо мақсади таҷлили Рӯзи ҷаҳонии футбол — 2026 мусобиқаи махсуси футбол баргузор шуд.

Тавре ба АМИТ «Ховар» аз Намояндагии доимии Ҷумҳурии Тоҷикистон дар Созмони Милали Муттаҳид хабар доданд, дар ин чорабинӣ дипломатҳои баландпояи намояндагиҳои доимии кишварҳои аъзои Созмони Милали Муттаҳид бо руҳияи рафоқат ва рақобати дӯстона иштирок намуданд.

Аксари аъзои ҳайатҳо ва мухлисон бо ифтихор либосҳои миллии футболи кишварҳои худро пӯшида,  фазои фараҳбахшу идона, дӯстӣ ва ягонагии миллатҳоро эҷод карданд. Ҳамаи иштирокдорон аз тантанаи руҳияи варзишӣ тибқи принсипҳои пойдори Созмони Милали Муттаҳид, аз ҷумла муколама, эҳтироми мутақобил ва қудрати муттаҳидкунандаи варзиш ҳаловат бурданд.

Дар натиҷаи мусобиқа гурӯҳи Осиё ва Уқёнуси Ором ғолиб омада, соли дуюм пай дар пай бо Ҷоизаи Рӯзи ҷаҳонии футболи Созмони Милали Муттаҳид сарфароз гардонида шуд.

АКС: Намояндагии доимии Ҷумҳурии Тоҷикистон дар Созмони Милали Муттаҳид