Дар шаҳри Боку Форуми соҳибкории Тоҷикистону Озарбойҷон баргузор шуд

ДУШАНБЕ, 22.05.2026 /АМИТ «Ховар»/. 22 май дар Маркази тиҷоратии шаҳри Боку Форуми соҳибкории Тоҷикистону Озарбойҷон бо иштироки намояндагони мақомоти давлатӣ, идораҳои соҳавӣ, инчунин доираҳои соҳибкорӣ ва тиҷоратии Ҷумҳурии Тоҷикистон ва Ҷумҳурии Озарбойҷон баргузор шуд. Дар ин хусус ба АМИТ «Ховар» аз Сафорати Ҷумҳурии Тоҷикистон дар Ҷумҳурии Озарбойҷон хабар доданд.

Чорабинӣ дар доираи ҷаласаи 8-уми Комиссияи байниҳукуматӣ оид ба ҳамкории тиҷоратию иқтисодӣ байни Ҷумҳурии Тоҷикистон ва Ҷумҳурии Озарбойҷон ташкил карда шуда, ба рушди робитаҳои мустақим байни доираҳои соҳибкории ду кишвар, густариши ҳамкории сармоягузорӣ ва баррасии дурнамои татбиқи лоиҳаҳои муштарак равона гардид.

Зимни форум ба иштирокчиён оид ба иқтидори сармоягузорию иқтисодии Тоҷикистон ва Озарбойҷон, фаъолияти минтақаҳои озоди иқтисодӣ, инчунин имтиёзҳои андозӣ ва дигар сабукиҳое, ки барои соҳибкорон пешбинӣ шудаанд, маълумоти муфассал пешниҳод гардид.

Дар ин росто, аҳамияти таҳкими минбаъдаи ҳамкории сармоягузорӣ байни доираҳои соҳибкории ду кишвар, таъсиси корхонаҳои муштарак ва татбиқи лоиҳаҳои мушаххас дар бахшҳои гуногуни иқтисод таъкид карда шуд.

Дар доираи суханрониҳо инчунин рӯнамо ва видеонаворҳо оид ба имконияти сармоягузорӣ, самтҳои афзалиятноки рушди иқтисод ва лоиҳаҳои дурнамодори Ҷумҳурии Тоҷикистон пешниҳод гардиданд.

Дар анҷоми форум бо иштироки намояндагони тақрибан 80 ширкату корхонаҳои Тоҷикистон ва Озарбойҷон вохӯриҳои дуҷониба дар қолаби B2B доир гардиданд.

Дар натиҷа байни корхонаву ширкатҳои ду кишвар оид ба омӯзиш ва пешбурди лоиҳаҳои муштараки тиҷоратию иқтисодӣ ва сармоягузорӣ як қатор тавофуқҳо ба даст омада, шартномаҳои дуҷониба ба имзо расонида шуданд.

АКС: Сафорати Ҷумҳурии Тоҷикистон дар Ҷумҳурии Озарбойҷон