Котиби Шурои амнияти Тоҷикистон дар Вохӯрии котибони шуроҳои амният дар қолаби «Осиёи Марказӣ – Русия» иштирок намуд

ДУШАНБЕ, 27.05.2026 /АМИТ «Ховар»/. 27 май дар шаҳри Москваи Федератсияи Русия Вохӯрии котибони шуроҳои амният дар қолаби «Осиёи Марказӣ – Русия» баргузор гардид, ки дар он Котиби Шурои амнияти Ҷумҳурии Тоҷикистон Юсуф Раҳмон иштирок намуд, хабар медиҳад АМИТ «Ховар».

Дар ҷараёни вохӯрӣ иштирокчиён оид ба масъалаҳои таъмини амният ва субот дар минтақа мубодилаи афкор намуда, вазъ ва дурнамои ҳамкории давлатҳои Осиёи Марказӣ бо Федератсияи Русия, инчунин тадбирҳои таҳкими ҳамоҳангсозӣ дар шароити таҳдиду чолишҳои муосирро баррасӣ карданд.

Таъкид гардид, ки қолаби «Осиёи Марказӣ – Русия» дар рушди муколамаи созанда ва таҳияи равишҳои ҳамоҳангшуда оид ба масъалаҳои калидии рӯзномаи минтақавӣ нақши муҳим дорад.

Иштирокчиён ба натиҷаҳои Саммити дуюми «Осиёи Марказӣ – Русия», ки 9 октябри соли 2025 дар шаҳри Душанбе таҳти раёсати Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон баргузор гардида буд, таваҷҷуҳи махсус зоҳир намуданд. Аҳамияти ҳуҷҷатҳои қабулшуда аз рӯи натиҷаҳои саммит, аз ҷумла Нақшаи амалҳои муштарак барои солҳои 2025–2027, ки ба густариши ҳамкорӣ дар соҳаҳои амният, иқтисод, нақлиёт, рақамикунонӣ ва энергетикаи «сабз» равона гардидааст, таъкид шуд.

Дар доираи ҷаласа масъалаҳои муқовимат бо терроризм ва экстремизми байналмилалӣ, ҷинояткории муташаккили фаромиллӣ, гардиши ғайриқонунии маводи мухаддир, инчунин таҳдидҳо дар соҳаи иттилоотӣ-коммуникатсионӣ баррасӣ гардиданд.

Юсуф Раҳмон зимни суханронӣ иброз намуд, ки Ҷумҳурии Тоҷикистон пайваста ҷонибдори таҳкими фазои эътимод, ҳамсоягии нек ва вокуниши муштарак ба таҳдидҳои муосир мебошад. Таъкид гардид, ки таҳти роҳбарии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои таҳкими амнияти миллӣ ва минтақавӣ, рушди ҳамкории байналмилалӣ ва тақвияти иқтидори сохторҳои соҳавӣ тадбирҳои ҳамаҷониба амалӣ мегарданд.

Аз рӯи натиҷаҳои Вохӯрӣ иштирокчиён ҳавасмандии худро барои таҳкими минбаъдаи ҳамкорӣ дар қолаби «Осиёи Марказӣ – Русия» ва идомаи ҳамкории амалӣ оид ба масъалаҳои мавриди таваҷҷуҳи муштарак тасдиқ намуданд.