WORLD JUDO MASTERS 2026. Ситораҳои ҷудои ҷаҳон ба Душанбе меоянд

Май 1, 2026 10:24

ДУШАНБЕ, 01.05.2026. /АМИТ «Ховар»/. Дар натиҷаи тадбирҳои пайгиронаи Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ва Президенти Федератсияи ҷудои Тоҷикистон Исмоил Маҳмадзоир нахустин маротиба дар пойтахти Тоҷикистон — шаҳри Душанбе мусобиқаи бонуфузи World Judo Masters 2026 баргузор мегардад, хабар додааст Федератсияи байналмилалии ҷудо.

Ба иттилои манбаъ, мусобиқа аз 18 то 20 декабри соли 2026 доир шуда, яке аз муҳимтарин чорабиниҳои тақвими ҷаҳонии ҷудо ба ҳисоб меравад. Дар он беҳтарин ҷудочиёни ҷаҳон танҳо бо даъват иштирок менамоянд.

Дар ҳар вазн 36 варзишгари беҳтарин иштирок карда, маҳдудияти шумораи иштирокчиён аз як кишвар пешбинӣ нашудааст. Ин имконият фароҳам меорад, ки қавитарин паҳлавонони ҷаҳон мустақиман бо ҳам рақобат намоянд.

Аз лиҳози раддабандии ҷаҳонӣ мусобиқа аҳамияти калон дорад: барои ҷойи аввал 1800 хол, ҷойи дуюм 1260 хол ва ҷойи сеюм 900 хол дода мешавад. Ин нишондиҳандаҳо ба мавқеи варзишгарон дар раддабандии ҷаҳонӣ таъсири ҷиддӣ мерасонанд. Ҳамзамон мусобиқа марҳилаи муҳими интихобӣ ба Бозиҳои олимпии тобистонаи 2028 арзёбӣ мегардад.

Интихоби Душанбе ҳамчун мизбон нишонаи рушди босуръати ҷудо дар Тоҷикистон арзёбӣ мешавад. Солҳои охир ин намуди варзиш бо дастгирии сохторҳои давлатӣ ва татбиқи барномаҳои соҳавӣ рушд ёфтааст. Натиҷаҳои варзишгарони тоҷик дар Бозиҳои олимпии Пекин 2008 ва Бозиҳои олимпии Париж 2024, ки ба даст овардани медалҳоро дар бар мегиранд, ба пешрафти минбаъдаи соҳа такони ҷиддӣ бахшиданд.

Президенти Федератсияи байналмилалии ҷудо Мариус Визер таъкид намуд, ки мусобиқаи мазкур сатҳи баландтарини ҷудо буда, дар он танҳо беҳтарин варзишгарон иштирок мекунанд. Ба андешаи ӯ, интихоби Душанбе нишонаи рушди назарраси ҷудо дар Тоҷикистон ва талошҳои густариши ин намуди варзиш дар ҷаҳон мебошад.

Президенти Федератсияи ҷудои Тоҷикистон Исмоил Маҳмадзоир низ изҳор дошт, ки мизбонии мусобиқа барои Тоҷикистон шарафи бузург буда, ин чорабинӣ пешрафти солҳои охир ва нақши рӯзафзуни кишварро дар ҷудои байналмилалӣ инъикос менамояд.

Солҳои охир Душанбе ба яке аз марказҳои муҳими ҷудои байналмилалӣ табдил ёфтааст. Аз ҷумла, аз соли 2023 инҷониб дар шаҳр мусобиқаҳои сатҳи ҷаҳонӣ мунтазам баргузор мегарданд. Мусобиқаи Dushanbe Grand Prix соли 2024 ба сатҳи Grand Slam бардошта шуд. Ҳамчунин баргузории чемпионати ҷаҳон байни наврасон дар соли 2024 мавқеи Тоҷикистонро ҳамчун мизбони боэътимод тақвият бахшид.

Мизбонии World Judo Masters-2026 дар Душанбе қадами муҳим дар роҳи рушди минбаъдаи ҷудо дар Тоҷикистон ва минтақаи Осиёи Марказӣ арзёбӣ мегардад. Ин мусобиқа дар баробари рақобати сатҳи олӣ имкони муаррифии бештари мамлакатро дар арсаи байналмилалӣ фароҳам меорад.

АКС: Федератсияи байналмилалии ҷудо