Дар Агентии суғуртаи иҷтимоӣ ва нафақа оид ба саҳми Пешвои миллат дар пойдории сулҳ ва ваҳдати миллӣ филми ҳуҷҷатӣ намоиш дода шуд

Июнь 27, 2026 18:30

ДУШАНБЕ, 27.06.2026. /АМИТ «Ховар»/. Дар Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон бахшида ба қабули қатъномаи Маҷмаи Умумии Созмони Милали Муттаҳид «Даҳсолаи байналмилалӣ оид ба таҳкими сулҳ барои наслҳои оянда, солҳои 2027-2036» ва 29–солагии Рӯзи Ваҳдати миллӣ ҳамоиши идона баргузор шуд. Дар ин хусус АМИТ «Ховар» бо истинод ба Агентии суғуртаи иҷтимоӣ ва нафақа иттилоъ медиҳад.

Дар чорабинии идона филми ҳуҷҷатӣ оид ба саҳми Пешвои миллат муҳтарам Эмомалӣ Раҳмон дар пойдории сулҳу оромӣ ва рушду пешрафти Тоҷикистони азиз манзури ҳозирин гардонда шуд.

Директори Агентӣ Абдураҳмон Ҳалимзод дар оғози чорабинӣ иброз дошт, ки қабули қатъномаи Даҳсолаибайналмилалӣ оид ба таҳкими сулҳ бо ташаббуси навбатии Президенти Тоҷикистон муҳтарам Эмомалӣ Раҳмон ба шароите рост меояд, ки дар минтақаҳои гуногуни сайёра миллионҳо нафар мардуми осоишта ба хавфу таҳдидҳои гуногуни амниятӣ ва ҷангҳои хонумонсӯз дучор мебошанд.

«Қабули ин санади муҳим амри саривақтӣ ва зарурӣ буда, дар таҳкими пешбурди рӯзномаиҷаҳонии фарҳанги сулҳ саҳми арзишманд мегузорад. Қатънома ҳамчун санади муҳимми байналмилалӣ ба таҳкими дӯстиву ҳамкории байни халқҳо, густариши фарҳанги сулҳ ва бунёди ҷаҳони амну осуда барои наслҳои имрӯзу оянда мусоидат менамояд»,- афзуд Абдураҳмон Ҳалимзод.

Вакили Маҷлиси намояндагони Маҷлиси Олии Ҷумҳурии Тоҷикистон Муҷибахон Ҷавҳарӣизҳор дошт, ки «тоҷикон ҳамчун миллати фарҳангӣ ва дигар мардумони форсизабон дар рушди илму маърифат ва тамаддуни ҷаҳонӣ саҳми сазовор гузоштаанд. Ташаббуси навбатии Пешвои миллати мо – қабули «Даҳсолаи байналмилалӣ оид ба таҳкими сулҳ» бори дигар собит намуд, ки фарзандони фарзонаи миллати тоҷик имрӯз ҳам дар ҳалли мушкилоти башарият саҳми назаррас мегузоранд».

Дар идомаи ҳамоиш иброз гардид, ки сулҳу ваҳдат имкон фароҳам оварданд, ки Тоҷикистони соҳибистиқлол таҳти сиёсати хирадмандонаи Президенти мамлакат муҳтарам Эмомалӣ Раҳмон дар муддати начандон зиёд ба дастовардҳои бузург ноил гардад. Воқеан ҳам, сулҳ, оромӣ, ваҳдат вожаҳоеанд, ки барои мардум ғизои маънавӣ, далели ҳаёти ояндаи осудаҳолона, сабаби рушди корҳои созандагиву ободонӣ, пешрафти ҳамаи соҳаҳои хоҷагии халқ мебошанд.

Таъкид гардид, ки Ваҳдати миллӣ дар сарнавишти ҳар як халқу миллат баробар ба истиқлоли давлатӣ аҳамият дорад. Аз ин рӯ, ҳар як шаҳрванди кишварро зарур аст, ки ваҳдати сартосариро ҳифз намояд,барои пойдории он талош намояд.

Дар фарҷоми чорабинӣ аз тарафи роҳбарияти Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон кормандони фаъол бо мукофотҳои хотиравӣ сарфароз гардиданд.

АКС: Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон