Файзалӣ Идизода бо Сафири Арабистони Саудӣ Холид ибни Абдуллоҳ аш-Шамронӣ вохӯрӣ намуд

ДУШАНБЕ, 23.06.2026 /АМИТ «Ховар»/. 22 июн Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо Сафири Арабистони Саудӣ Холид ибни Абдуллоҳ аш-Шамронӣ вохӯрӣ намуд. Дар ин хусус АМИТ «Ховар» бо истинод ба Маҷлиси намояндагон хабар медиҳад.

Дар мулоқот иброз гардид, ки муносибатҳои байнипарлумонӣ бо Маҷлис аш-Шурои Подшоҳии Арабистони Саудӣ солҳои охир вусъати тоза пайдо намудааст. Дар таҷрибаи ҳамкории байнипарлумонӣ мунтазам муколама, сафарҳо ба мамлакатҳои ҳамдигар ва мулоқоту вохӯриҳо барпо мегарданд, ки барои пешрафти муносибатҳо, устувор гардидани робитаҳои дӯстиву бародарӣ байни мардумонамон мусоидат менамоянд.

Имрӯз барои ташаккули робитаҳои байнипарлумонии ду давлат, фаъолияти гурӯҳи дӯстӣ ва ҳамкории Маҷлиси намояндагон ва Маҷлис-аш-Шурои Арабистони Саудиро боз ҳам густариш дода, муколамаҳо ва мубодилаи сафарҳои расмии ҳайати гурӯҳҳоро ба роҳ монда, барои ба пешравиҳо ноил гардидан, талошҳои муштаракро ба харҷ додан зарур аст.

Инчунин дар мулоқот таъкид гардид, ки ҳолати имрӯзаи муносибатҳои дуҷонибаи байни Тоҷикистон ва Подшоҳии Арабистони Саудӣ дар маҷмуъ нишон медиҳад, ки ҳамкории мутақобилан судманди тарафҳо, бо вуҷуди рушд, ҳанӯз ҳам дар марҳилаи ҷустуҷӯи манфиатҳои муштарак қарор доранд.

АКС: Маҷлиси намояндагони Маҷлиси Олии Ҷумҳурии Тоҷикистон