Дар Фаронса дастовардҳои Тоҷикистон дар самти ислоҳоти судӣ — ҳуқуқӣ муаррифӣ гардид

ДУШАНБЕ, 03.07.2026 /АМИТ «Ховар»/. Аз 30 июн то 2 июл дар шаҳри Парижи Ҷумҳурии Фаронса Конгресси нуҳуми ҷаҳонӣ зидди ҷазои қатл доир гардид, ки дар кори он Вазири адлияи Ҷумҳурии Тоҷикистон Музаффар Ашуриён иштирок намуд.

Тавре аз Вазорати адлияи Ҷумҳурии Тоҷикистон ба АМИТ «Ховар» хабар доданд, дар конгресс дастовардҳои Тоҷикистон дар самти ислоҳоти судӣ –ҳуқуқӣ, гуманизатсияи қонунгузории ҷиноятӣ пас аз боздоштани ҷазои қатл дар соли 2004 ва нақшаҳои минбаъда оид ба такмили қонунгузорӣ муаррифӣ гардид.

Иброз гардид, ки дар таҳрири нав таҳия кардани Кодекси ҷиноятӣ ва Кодекси иҷрои ҷазои ҷиноятӣ, инчунин лоиҳаи қонунҳои Ҷумҳурии Тоҷикистон «Дар бораи низоми иҷрои ҷазои ҷиноятӣ» ва «Дар бораи пробатсия» аз сиёсати инсондӯстонаи Ҳукумати Ҷумҳурии Тоҷикистон шаҳодат медиҳад.

Ба иштирокчиёни конгресс иттилоъ дода шуд, ки барои пурра аз байн бурдани ҷазои қатл бояд ислоҳоти қонунгузории ҷумҳурӣ ва низоми иҷрои ҷазои ҷиноятӣ идома ёфта, шароити муассисаҳои иҷрои ҷазои ҷиноятӣ ба талаботи меъёрҳои байналмилалӣ ва нигаҳдории маҳбусоне, ки нисбаташон ҷазои якумра маҳрум сохтан аз озодӣ татбиқ шудааст, амалӣ карда мешавад.

Дар фарҷом Вазири адлия омодагии Ҷумҳурии Тоҷикистонро барои идомаи муколамаи кушоду созанда оид ба масъалаи бекор намудани ҷазои қатл иброз дошт.

Конгресси ҷаҳонӣ зидди ҷазои қатл бузургтарин платформае мебошад, ки беш аз ҳазор иштирокчӣ ва 90 давлати ҷаҳонро муттаҳид мекунад.

АКС: Вазорати адлияи Ҷумҳурии Тоҷикистон