Дар шоҳроҳи Душанбе — Кӯлоб — Хоруғ бар асари садамаи нақлиётӣ 11 нафар ба ҳалокат расид

ДУШАНБЕ, 02.07.2026 /АМИТ «Ховар»/. Субҳи 2 июл, тахминан соати 06:30, дар километри 32-юми шоҳроҳи мошингарди Душанбе – Кӯлоб – Хоруғ, дар ҳудуди деҳаи Элоки Ҷамоати деҳоти Карим Исмоили шаҳри Ваҳдат садамаи вазнини нақлиётӣ рух дод. Дар ин хусус ба АМИТ «Ховар» аз Вазорати корҳои дохилии Ҷумҳурии Тоҷикистон хабар доданд.

Тибқи иттилои манбаъ, ронандаи воситаи нақлиёти боркаши тамғаи «Дулан» (рақами қайди давлатиаш 5180 ММ 01) Фирдавс Абдуллоев, сокини ноҳияи Ёвон бинобар аз кор баромадани низоми боздорандаи воситаи нақлиёт, нахуст ба мошини тамғаи «Опел Зафира» (рақами қайди давлатиаш 1813 SS 01) таҳти идораи сокини ноҳияи Восеъ Сафаралӣ Кӯлобиев ва баъдан ба мошини  тамғаи «Тойота Прадо» (рақами қайди давлатиаш 1121 UU 01) таҳти идораи сокини ноҳияи Роштқалъа Оқил Палавонов бархӯрдааст.

Дар натиҷаи садама ронандаи мошини боркаши «Дулан», ронандаи мошини «Тойота Прадо» ва 9 нафар мусофирони мошинҳои «Опел Зафира» ва «Тойота Прадо» дар ҷойи ҳодиса ба ҳалокат расиданд. Шахсияти баъзе аз мусофирон муайян карда мешавад.

Ба ҷойи ҳодиса намояндагони мақомоти корҳои дохилӣ, прокуратура ва дигар масъулони сохторҳои дахлдор ҳозир шуда, ҷараёни тафтиши ҳодиса таҳти назорат қарор дорад.

Вазорати корҳои дохилӣ иттилоъ медиҳад, ки айни замон сабаб ва дигар ҳолатҳои рух додани ин садама мавриди таҳқиқ қарор доранд.

АКС аз бойгонӣ