Дар Тоҷикистон беш аз 600 ҳолати машғул шудан ба ҷодугарӣ ва фолбинӣ ошкор карда шуд

ДУШАНБЕ, 22.07.2026 /АМИТ «Ховар»/. Дар шашмоҳаи якуми соли 2026 дар Тоҷикистон 604 ҳолати машғул шудан ба ҷодугарӣ ва фолбинӣ ошкор карда шуд. Дар ин хусус Вазири корҳои дохилии Ҷумҳурии Тоҷикистон Рамазон Раҳимзода 21 июл зимни нишасти матбуотӣ ба хабарнигорон иттилоъ дод.

Вазир гуфт, ин омор нишон медиҳад, ки то ҳол бархе шаҳрвандон ба сеҳру ҷоду ва фолбинӣ бовар доранд.

«Аз рӯзноманигорон ва дигар масъулини дахлдор хоҳиш мекунем, ки корҳои фаҳмондадиҳиро дар ин самт тақвият бахшанд. Мубориза бо ҷодугарӣ ва фолбинӣ танҳо вазифаи мақомоти корҳои дохилӣ набуда, масъулияти муштараки ҷомеа мебошад»,–таъкид намуд Рамазон Раҳимзода.

Ёдовар мешавем, ки дар шашмоҳаи якуми соли 2025 дар Тоҷикистон 495 ҳолати ҷодугарӣ ва фолбинӣ ошкор гардида буд. Яъне, дар шашмоҳаи якуми соли 2026 шумораи чунин ҳолатҳо 109 адад зиёд шудааст.

Солҳои охир дар ҷомеа шумораи одамоне, ки ба фолбинӣ ва ҷодугарӣ рӯй овардаанд, зиёд гардидааст. Дар ин самт аз ҷониби кормандони милитсияи ҷумҳурӣ ҳамарӯза дар саросари мамлакат амалиёти санҷишӣ гузаронида мешаванд.

Ҳарчанд Вазорати корҳои дохилӣ ва раёсату шуъбаҳои он дар шаҳру ноҳияҳо ба сокинон зарари фолбинӣ ва сеҳру ҷодуро фаҳмонида, таъкид менамоянд, ки машғул шудан ба фолбинӣ ва боварӣ ба фолбинону истифода аз хизмати соҳирон нангинтарин амал ба шумор меравад, аммо аксари онҳо дидаю дониста, боз ба ин кирдори номатлуб даст мезананд.

Дар Тоҷикистон барои машғул шудан ба ҷодугарӣ ва фолбинӣ ҷавобгарӣ пешбинӣ карда шудааст. Ба ҳамаи онҳое, ки маротибаи аввал ба даст меафтанд, тибқи моддаи 482-и Кодекси ҳуқуқвайронкунии маъмурии Ҷумҳуриии Тоҷикистон ҷарима ба маблағи аз 6000 то 7500 сомонӣ ё ҳабси маъмурӣ ба муҳлати то 15 рӯз таҳдид менамояд. Барои такрори қонуншиканӣ ё вазнинтар эътироф шудани амалу кирдор тибқи моддаи 240.1-и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда мешавад. Тибқи он ҷарима ба маблағи аз 112 ҳазору 500 то 150 000 сомонӣ ё маҳрумият аз озодӣ ба муҳлати аз 1 то 2 сол пешбинӣ карда шудааст.

Бояд гуфт, ки шуруъ аз 31 июли соли 2025 дар Кодекси ҳуқуқвайронкунии маъмурии Ҷумҳурии Тоҷикистон моддаи 482 илова 1 (истифода аз хизматрасонии сеҳрдон, ҷодугар ва фолбин) мавриди амал қарор гирифт. Тибқи талаботи ин модда нисбат ба шаҳрвандоне, ки ба назди фолбинон рафта, аз чунин хизматрасониҳо истифода мебаранд, ҷаримаи маъмурӣ ба андозаи аз 50 (3750 сомонӣ) то 60 (4500 сомонӣ) нишондиҳанда пешбинӣ шудааст.

Мувофиқи ин тағйиру иловаҳо, шаҳрвандоне, ки ба назди фолбинону ҷодугарон рафта, аз хизматрасонии онҳо истифода мекунанд, акнун ба ҷавобгарии маъмурӣ кашида мешаванд.

Моҳинави НАВРӮЗ,
АМИТ «Ховар»

АКС: АМИТ «Ховар»