НИШАСТИ МАТБУОТӢ. То ҷашни 35-солагии Истиқлоли давлатӣ беш аз 1400 иншоот ба истифода дода мешавад

ДУШАНБЕ, 09.07.2026 /АМИТ «Ховар»/. То 1 июли соли 2026 дар мамлакат бахшида ба ҷашни 35-солагии Истиқлоли давлатӣ 31 ҳазору 377 иншооти таъйиноти гуногун сохта, ба истифода дода шуд. Иҷрои нақшаи пешбинишуда 106,3 фоизро ташкил дод. Дар ин хусус ба намояндагони расонаҳои хабарӣ Раиси Кумитаи меъморӣ ва сохтмони назди Ҳукумати Ҷумҳурии Тоҷикистон Низом Мирзозода имрӯз зимни нишасти матбуотӣ иттилоъ дод.

Низом Мирзозода афзуд, ки илова бар ин, дар 1 ҳазору 412 иншооти дигар корҳои сохтмонӣ идома доранд. Бо ба истифода додани онҳо шумораи иншоот дар мамлакат ба 32 ҳазору 789 адад мерасад, ки он 111 фоизро ташкил медиҳад.

«Кумита барои бо сатҳу сифати баланд бунёд гардидани биною иншооти ҷашнӣ, сари вақт бо ҳуҷҷатҳои лоиҳавӣ таъмин намудани муроҷиаткунандагон ва аз экспертизаи давлатӣ гузаронидани лоиҳаҳои иншоот, инчунин дастгирии ташаббусҳои созандаи соҳибкорон чораҷӯӣ намуда истодааст», -изҳор шуд дар нишаст.

Гуфта шуд, ки кумита бо мақсади баҳодиҳии риояи меъёру қоидаҳои шаҳрсозӣ, регламентҳои техникии сифати технологии корҳои сохтмонӣ, мавод ва маснуоти сохтмонӣ, инчунин дигар санадҳои қонунгузории шаҳрсозӣ дар бино ва иншооти сохташаванда ва ба заминҷунбӣ тобовар дар шаҳру ноҳияҳои ҷумҳурӣ озмоишгоҳи махсусгардонидашуда бо таҷҳизоти муосир таъсис додааст. Ин иқдом дар асосои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон амалӣ гардид.

Таъкид шуд, ки яке аз самтҳои асосии фаъолияти кумита ин таъмини шаҳру ноҳияҳои ҷумҳурӣ бо нақшаҳои генералӣ ва нақшаҳои муфассали банақшагирии маҳал мебошад. Айни замон 65 маркази шаҳру ноҳияҳои ҷумҳурӣ пурра бо нақшаҳои генералӣ таъмин мебошанд.

Ширинмоҳ ҚОСИМӢ,
АМИТ «Ховар»

АКС: АМИТ «Ховар»