Прокуратураи генералӣ оид ба иҷрои қонунгузории мамлакат беш аз 4,6 ҳазор санҷиш гузаронид

ДУШАНБЕ, 23.07.2026 /АМИТ «Ховар»/. Доир ба вазъи риоя ва иҷрои қонунгузории мамлакат давоми нимсолаи якуми соли равон аз ҷониби Прокуратураи генералии Ҷумҳурии Тоҷикистон 4 ҳазору 698 санҷиш гузаронида, ҳуқуқу манфиатҳои поймолшудаи 235 ҳазору 586 нафар шаҳрвандон барқарор карда шуд. Инчунин 38 ҳазору 627 санади эътиноии прокурорӣ татбиқ гардида, 47 ҳазору 602 нафар ба ҷавобгарии моддӣ, интизомӣ ва маъмурӣ кашида шуда, 2 ҳазору 842 парвандаи ҷиноятӣ оғоз гардидааст. Чунин иброз намуд дар нишасти матбуотӣ Прокурори генералии Ҷумҳурии Тоҷикистон Ҳабибулло Воҳидзода ба намояндагони расонаҳои хабарӣ.

Гуфта шуд, ки бо дахолати прокуророн 1 миллиарду 159 миллион сомонӣ, аз ҷумла 365 миллион сомонӣ ба манфиати давлат барқарор гардида, 107 гектар қитъаи замин ба ҳолати аввала баргардонида, 1 ҳазору 430 сар чорво ба тариқи асл барқарор карда шуд.

Инчунин назорати 7 ҳазору 774 парвандаи ҷиноятӣ таъмин гардида, аз ин шумора 7 ҳазору 254 парванда барои баррасӣ ба суд ирсол карда шудааст.

Муфаттишони прокуратура тафтиши 2 ҳазору 471 парвандаи ҷиноятиро ба анҷом расониданд. Зимни тафтиши пешакӣ 53,3 миллион сомонӣ, аз ҷумла 27,5 миллион сомонӣ ба манфиати давлат барқарор карда шуд.

Прокуророн дар ин давра дар баррасии 5 ҳазору 567 парвандаи ҷиноятӣ ва 6 ҳазору 558 парвандаи маданӣ, оилавӣ, иқтисодӣ ва маъмурӣ иштирок намуда, ба 507 санади ғайриқонунии судҳо эътироз овардаанд.

Бо мақсади тарғибу ташвиқи қонунгузорӣ беш аз 14 ҳазор суҳбату вохӯрӣ баргузор гардида, тавассути воситаҳои ахбори омма зиёда аз 2 ҳазору 300 баромад, аз ҷумла 932 барномаи телевизионӣ, 713 барномаи радиоӣ ва 688 маводи матбуотӣ пахш ва нашр карда шуд.

Марзия САИДЗОДА,
АМИТ «Ховар»

АКС: АМИТ «Ховар»