Вазирони тандурустии давлатҳои аъзои ТУТ масъалаи муқовимат ба ҳолатҳои фавқулодаро баррасӣ намуданд

ДУШАНБЕ, 03.07.2026 /АМИТ «Ховар»/. 1 ва 2 июл дар шаҳри Истамбули Ҷумҳурии Туркия Конфронси вазирони тандурустии давлатҳои аъзои Ташкилоти умумиҷаҳонии тандурустӣ оид ба тақвияти санитарӣ ва амнияти эпидемиологӣ дар чаҳорчӯби чораҳо оид ба муқовимат ба ҳолатҳои фавқулодаи марбут ба заминларза баргузор гардид. Дар ин хусус ба АМИТ «Ховар» аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд.

Дар конфронс Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода иброз намуд, ки дар Тоҷикистон баланд бардоштани устувории низомҳои тандурустӣ дар ҳолатҳои фавқулодаи марбут ба заминларза яке аз авлавиятҳои асосии сиёсати тандурустӣ мебошад.

Таъкид гардид, ки устувории низоми тандурустӣ аз омодагӣ ба хатарҳо оғоз мешавад. Бинобар ин, такмил додани механизмҳои пешгӯии таҳдид ва арзёбии системаҳои муосири огоҳкунии барвақт, тақвияти чаҳорчӯбаи ҳуқуқӣ ва омӯзиши мунтазами аҳолӣ ва мутахассисон дар вокуниш ба заминларза зарур мебошад. Дар баробари ин, таваҷҷуҳи махсус бояд ба гурӯҳҳои осебпазир- кӯдакон, занон, пиронсолон ва шахсони дорои маъюбӣ равона карда шавад.

Гуфта шуд, ки баланд бардоштани устувории системаҳои тандурустӣ ба заминларзаҳо ба равиши ҳамаҷониба ниёз дорад, ки рушди инфрасохтор, омӯзиши қувваи корӣ, рақамикунонӣ, ҳамкории байнисоҳавӣ ва ҷалби фаъоли ҷомеаро дарбар мегирад. Танҳо тавассути талошҳои муштарак мо метавонем ҳифзи саломатӣ ва ҳаёти мардумро дар муқобили офатҳои табиӣ таъмин кунем.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон