Намояндаи Парлумони Тоҷикистон дар конфронси байналмилалӣ бахшида ба 35-солагии Истиқлоли давлатии Узбекистон иштирок намуд

ДУШАНБЕ, 15.08.2026 /АМИТ «Ховар»/. Дар шаҳри Тошканд бахшида ба 35-солагии Истиқлоли давлатии Ҷумҳурии Узбекистон конфронси байналмилалии илмӣ-амалӣ баргузор гардид, иттилоъ медиҳад АМИТ «Ховар» бо истинод ба Маҷлиси намояндагони Маҷлиси Олии Ҷумҳурии Тоҷикистон.

Дар конфронси байналмилалӣ раиси кумитаи Маҷлиси намояндагони Маҷлиси Олии Ҷумҳурии Тоҷикистон оид ба корҳои байналмилалӣ, иттиҳодияҳои ҷамъиятӣ ва иттилоот Маҳмадшоҳ Гулзода иштирок ва сухан намуд.

Иброз гардид, ки бо тай намудани роҳи устувори рушди давлатдорӣ, пешрафти иқтисодию иҷтимоӣ ва таҳкими мавқеи байналмилалӣ Ҷумҳурии Узбекистон сиёсати созандаеро пеш мебарад, ки ба таҳкими фазои ҳамсоягии нек, эътимоди мутақобил ва рушди ҳамкории созанда байни давлатҳои минтақа нигаронида шудааст.

Таъкид шуд, ки муносибатҳои Тоҷикистон ва Узбекистон бар пояи пайвандҳои амиқи таърихию фарҳангӣ ва маънавӣ, суннатҳои деринаи ҳамсоягии нек ва эҳтироми мутақобил устувор буда, бо иродаи сиёсии роҳбарияти ду кишвар пайваста таҳким ёфта, ба сӯи рушди бештари дӯстӣ, эътимод ва ҳамкории созанда равона гардидаанд. Хусусан сиёсати пешгирифтаи Сарони давлатҳои Тоҷикистон ва Узбекистон барои ба сатҳи нави шарикии стратегӣ баровардани муносибатҳои ду кишвар заминаи мусоид фароҳам овардааст.

Инчунин ба нақши дипломатияи парлумонӣ таваҷҷуҳи хос зоҳир карда шуд. Гуфта шуд, ки робитаҳои байнипарлумонӣ яке аз василаҳои муҳими таҳкими эътимод буда, ба нигоҳ доштани руҳияи муколама, табодули таҷриба ва таҳкими заминаҳои ҳуқуқии ҳамкории дарозмуддат мусоидат мекунанд.

АКС: Маҷлиси намояндагони Маҷлиси Олии Ҷумҳурии Тоҷикистон