ОГОҲӢ! Аз 21 то 24 август дар баъзе минтақаҳои Тоҷикистон омадани сел пешгӯӣ мешавад

ДУШАНБЕ, 20.08.2026 /АМИТ «Ховар»/. Тибқи иттилои Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон, аз 21 то 24 август бинобар баланд шудани ҳарорати ҳаво дар ноҳияҳои алоҳидаи кӯҳии тобеи ҷумҳурӣ, вилояти Суғд ва ноҳияҳои ғарбии Вилояти Мухтори Кӯҳистони Бадахшон хавфи омадани селҳои пиряхӣ боқӣ мемонад.

22-23 август дар шаҳру ноҳияҳои вилояти Хатлон, ноҳияҳои тобеи ҷумҳурӣ,  шаҳри Душанбе ва 23-24 август дар минтақаҳои шарқии Вилояти Мухтори Кӯҳистони Бадахшон бо сабаби омилҳои метеорологӣ (хокборише, ки аз самти минтақаҳои ҷанубу ғарбӣ ва ҷанубӣ ба мамлакат ворид мегардад) баланд шудани ҳолати ифлосшавии ҳавои атмосферӣ аз моддаҳои муаллақ (чанг), заррачаҳои андозаашон то 10 мкр (Рм-10) ва заррачаҳои андозаашон то 2,5 мкр (Рм-2,5) дар назар аст.

Ба шаҳрвандон тавсия дода мешавад, ки дар чунин шароити вазъи обу ҳавотадбирҳои эҳтиётӣ андешанд.

Мутахассисон тавсия медиҳанд, ки бо назардошти баланд шудани ҳарорати ҳаво барои пешгирии таъсири манфии мавҷи гармӣ ба саломатии аҳолӣ, махсусан гурӯҳҳои осебпазир бояд тадбирҳои иловагӣ андешида шаванд.

АКС: АМИТ «Ховар»