Самтҳои афзалиятноки рушди таҳсилоти касбӣ бо намояндагони Бонки Осиёии Рушд баррасӣ гардид

ДУШАНБЕ, 20.08.2026 /АМИТ «Ховар»/. Самтҳои афзалиятноки рушди таҳсилоти касбӣ, таҳкими заминаи моддию техникӣ ва густариши ҳамкорӣ 19 август дар мулоқоти раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон Фарҳод Раҳимӣ бо ҳайати намояндагони Бонки Осиёии Рушд мавриди баррасӣ қарор дода шуданд.

Тавре АМИТ «Ховар» бо истинод ба ин кумита хабар медиҳад, дар мулоқот ҷонибҳо зарурати такмили инфрасохтори таълимӣ, беҳтар намудани шароити таълим, таҷҳизонидани муассисаҳо бо технология ва таҷҳизоти муосир ва фароҳам овардани муҳити мусоиди таълимиро иброз намуданд.

Ҳамчунин масъалаи баланд бардоштани сифати таҳсилоти касбӣ ва мутобиқ намудани омодасозии кадрҳо ба талаботи муосири бозори меҳнат мавриди таваҷҷуҳ қарор гирифт. Таъкид шуд, ки рақобатпазирии хатмкунандагон, пеш аз ҳама, аз сатҳи донишҳои назариявӣ, малакаҳои амалӣ ва мутобиқ будани ихтисосҳои омӯхташуда ба талаботи иқтисоди муосир вобаста мебошад. Дар ин раванд ҳамкории муассисаҳои таълимӣ бо корфармоён, истифодаи технологияҳои нав, таҳкими заминаи таҷрибавию истеҳсолӣ ва такмили малакаҳои омӯзгорону устоҳои таълимӣ аҳаммияти муҳим дорад.

Дар мулоқот мусоҳибон зарурати таҳияи пешниҳодҳои мушаххас, тақвияти ҳамоҳангсозии фаъолият ва идомаи муколамаи мунтазамро таъкид карданд.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон