Таҳияи Харитаи роҳ оид ба татбиқи Нақшаи глобалии амали гендерӣ дар соҳаи гуногунии биологӣ дар Тоҷикистон баррасӣ гардид

ДУШАНБЕ, 24.08.2026 /АМИТ «Ховар»/. Масъалаи ҳамгиро намудани равишҳои гендерӣ ба сиёсати миллӣ ва фаъолияти амалӣ дар соҳаи ҳифзи гуногунии биологӣ дар машварате, ки дар шаҳри Душанбе баргузор гардид, баррасӣ карда шуд, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Дар машварат, ки намояндагони мақомоти давлатӣ, ташкилоти ҷамъиятӣ, бахши хусусӣ, ташкилоти шарик оид ба рушд ва коршиносони мустақил иштирок намуданд, ба таҳияи Харитаи роҳ оид ба татбиқи Нақшаи глобалии амали гендерӣ дар соҳаи гуногунии биологӣ дар Тоҷикистон таваҷҷуҳ зоҳир намуданд.

Ҳуҷҷати роҳнамо дар доираи ташаббуси глобалии «Суръатбахшии тағйироти низомӣ ҷиҳати таъмини баробарии гендерӣ ва ҳифзи гуногунии биологӣ тавассути стратегияҳо ва нақшаҳои миллии амал оид ба гуногунии биологӣ» таҳия гардида, самти алоҳидаи муҳокимаи нишондиҳандаҳои гендерӣ оид ба вазифаҳои навшудаи Стратегияи миллӣ ва «Нақшаи амали Тоҷикистон оид ба гуногунии биологӣ то соли 2040»-ро дар бар мегирад.

Машварати мазкур ба баррасӣ ва имзои нақшавии Ёддошти тафоҳум оид ба ҳамкорӣ байни Кумитаи кор бо занон ва оила ва Кумитаи ҳифзи муҳити зист аҳамияти махсус мебахшад. Ҳуҷҷати мазкур ба таҳкими ҳамкории институтсионалии ду сохтор ва фароҳам овардани замина барои фаъолияти муштараки мунтазам ва низомманд дар самти ҳамгироии масъалаҳои баробарии гендерӣ ва ҳифзи гуногунии биологӣ мусоидат хоҳад кард.

Интизор меравад, ки дар натиҷа пешниҳодҳои мувофиқашуда оид ба такмили Харитаи роҳ таҳия гардида, нишондиҳандаҳои пешакии гендерӣ доир ба ҳадафҳои миллӣ дар соҳаи гуногунии биологӣ муайян карда шаванд ва барои рушди минбаъдаи ҳамкории институтсионалӣ замина гузошта шавад.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон