35-СОЛАГИИ ИСТИҚЛОЛИ ДАВЛАТӢ. Дар ноҳияи Тоҷикобод хати нави оби нӯшокӣ ва иншооти иҷтимоӣ мавриди истифода қарор гирифтанд

ДУШАНБЕ, 12.09.2026 /АМИТ «Ховар»/. Дар доираи сафари кории Президенти Ҷумҳурии Тоҷикистон муҳтарам Эмомалӣ Раҳмон ба ноҳияҳои минтақаи Рашт ва бо мақсади вусъат бахшидан ба корҳои ободонию созандагӣ дар ноҳияи Тоҷикобод якчанд иншооти нави иҷтимоиву хизматрасонӣ мавриди истифода қарор гирифтанд.

Тавре ба АМИТ «Ховар» аз Мақомоти иҷроияи ҳокимияти давлатии ноҳияи Тоҷикобод хабар доданд, дар доираи тадбирҳои созандагӣ дар ноҳия иншооти соҳаҳои маориф, варзиш, сайёҳӣ, савдо ва хизматрасонӣ сохта шуда, ҳамзамон дар деҳаҳои Зарафшон, Навобод, Нӯшори боло ва шаҳраки Тоҷикобод хатҳои нави оби нӯшокӣ ба истифода дода шуданд.

Иншоот ба ифтихори ҷашни 35–солагии Истиқлоли давлатии Ҷумҳурии Тоҷикистон бунёд карда шуда, барои фароҳам овардани шароити мусоиди зиндагӣ, таҳсил, истироҳат ва хизматрасонӣ ба сокинони ноҳия равона гардидаанд. Ба истифода додани чунин иншооти муҳими инфрасохторӣ барои беҳтар намудани таъминоти аҳолӣ бо оби тозаи нӯшокӣ аҳамияти муҳим дошта, ба баланд бардоштани сатҳи зиндагии сокинон мусоидат менамояд.

Бунёд ва мавриди истифода қарор гирифтани иншооти соҳаҳои маориф ва варзиш барои фароҳам овардани шароити мусоид барои насли наврас ва ҷавонон заминаи бештар фароҳам меорад. Таъсиси чунин иншоот ба рушди қобилияти зеҳнӣ ва ҷисмонии наврасон, тарғиби тарзи ҳаёти солим ва ҷалби бештари ҷавонон ба машғулияти варзишӣ мусоидат мекунад.

Рушди соҳаҳои сайёҳӣ, савдо ва хизматрасонӣ низ аз самтҳои муҳими пешрафти иқтисодию иҷтимоии ноҳия ба шумор меравад. Бунёди иншооти нав дар ин самтҳо метавонад барои беҳтар гардидани сатҳу сифати хизматрасонӣ, фароҳам овардани ҷойи нави кор, рушди соҳибкорӣ ва истифодаи самараноки имконияти мавҷудаи ноҳия замина гузорад.

Ноҳияи Тоҷикобод дорои табиати зебо, мавзеъҳои кӯҳӣ ва имконоти  мусоиди рушди сайёҳии дохилию экологӣ мебошад. Аз ин рӯ, ба роҳ мондани инфрасохтори муосири сайёҳӣ ва хизматрасонӣ метавонад дар оянда ба ҷалби сайёҳон ва рушди иқтисоди маҳаллӣ таъсири мусбат расонад.

Ба фаъолият оғоз намудани иншооти нав дар доираи ҷашни 35-солагии Истиқлоли давлатии Ҷумҳурии Тоҷикистон идомаи корҳои ободонию созандагӣ дар шаҳру ноҳияҳои мамлакат ба ҳисоб меравад. Ин иқдомҳо дар партави сиёсати созанда ва бунёдкоронаи Пешвои миллат муҳтарам Эмомалӣ Раҳмон амалӣ карда шуданд.

Корҳои созандагӣ ва ободонӣ дар ноҳияи Тоҷикобод идома дошта, ҳадафи асосии онҳо фароҳам овардани шароити беҳтари зиндагӣ барои аҳолӣ, рушди инфрасохтори иҷтимоӣ, густариши имконияти иқтисодӣ ва баланд бардоштани сатҳи хизматрасонӣ мебошад.

АКС: Мақомоти иҷроияи ҳокимияти давлатии ноҳияи Тоҷикобод