Байни Вазорати молияи Тоҷикистон ва ширкати «Oppenheimer & Co. Inc.» Ёддошти тафоҳум оид ба ҳамкорӣ ба имзо расид

ДУШАНБЕ, 16.09.2026 /АМИТ «Ховар»/. 14 сентябр дар шаҳри Лондон мулоқоти Вазири молияи Ҷумҳурии Тоҷикистон Файзиддин Қаҳҳорзода бо роҳбари ширкати «Oppenheimer & Co. Inc.» Массимилиано Лами ва муовини раиси Бонки сармоягузории ширкати «Citigroup Inc.» Вилям Уивер доир гардид. Дар ин хусус ба АМИТ «Ховар» аз Вазорати молияи Ҷумҳурии Тоҷикистон иттилоъ доданд.

Дар мулоқот аз ҷониби Вазири молияи Ҷумҳурии Тоҷикистон Файзиддин Қаҳҳорзода ва роҳбари ширкати «Oppenheimer & Co. Inc.» Массимилиано Лами Ёддошти тафоҳум оид ба тақвияти минбаъдаи ҳамкорӣ ба имзо расонида шуд. Дар доираи ин ёддошт ҷонибҳо барои беҳтар намудани рейтингҳои байналмилалии қарзиву содиротии ҷумҳурӣ ва баромадани Тоҷикистон ба бозорҳои молиявии ҷаҳонӣ ҳамкорӣ мекунанд.

Дар анҷоми мулоқот Массимилиано Лами ва Вилям Уивер ҳавасмандии худро барои густариши ҳамкорӣ изҳор намуданд.

Инчунин дар ин рӯз вохӯрии Файзиддин Қаҳҳорзода бо Роҳбари бахши бозорҳои қарзии сармояи ширкати «J.P. Morgan» дар минтақаи Аврупои Марказӣ, Шарқӣ, Ховари Миёна ва Африқо Стефан Вайлер ва ноиби аввали президенти ширкати «PIMCO» Брайан Ҳолмс баргузор гардид.

Файзиддин Қаҳҳорзода оид ба рушди макроиқтисодии ҷумҳурӣ, беҳтаршавии рейтинги пардохтпазирии он, таҷрибаи Тоҷикистон дар бозорҳои байналмилалии қарзӣ, рушди бозори дохилии коғазҳои қиматноки давлатӣ ва маблағгузории сабз маълумот пешниҳод намуд.

Стефан Вайлер ва Брайан Ҳолмс дар робита ба маълумоти манзуршуда барои ҳамкорӣ бо Тоҷикистон дар самти барориши коғазҳои қиматнок дар бозорҳои байналмилалии сармоя бо муҳлатҳои гуногун ибрози омодагӣ намуданд.

Дар анҷоми вохӯрӣ ҷонибҳо оид ба масъалаҳои дигари мавриди назар мубодилаи афкор намуданд.

АКС: Вазорати молияи Ҷумҳурии Тоҷикистон