Дар Тоҷикистон нахустин толори варзишии шамшербозии «Шеру Шамшер» ифтитоҳ шуд

ДУШАНБЕ, 05.09.2026 /АМИТ «Ховар»/. 4 сентябр дар кӯчаи Қарамови шаҳри Душанбе бахшида ба ҷашни 35-солагии Истиқлолияти давлатии Ҷумҳурии Тоҷикистон нахустин толори варзишии шамшербозӣ дар ҷумҳурӣ «Шеру Шамшер» ифтитоҳ гардид. Дар ин хусус АМИТ «Ховар» бо истинод ба Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар медиҳад.

Оғози фаъолияти ин толори варзишӣ марҳилаи муҳим дар ташаккули инфрасохтори муосири варзишии ҷумҳурӣ маҳсуб ёфта, барои оммавӣ гардонидани шамшербозӣ, инчунин рушди варзиши кӯдакону наврасон заминаи мусоид фароҳам меорад.

Толори варзишии шамшербозӣ бо тамоми инфрасохтори соҳавӣ, ки барои гузаронидани раванди пурраи таълимию тамринӣ ва мусобиқаҳои варзишӣ зарур аст, таъмин мебошад. Дар ихтиёри варзишгарон роҳравҳои махсуси шамшербозӣ (пистҳо), таҷҳизоти муосири тамринӣ ва либосу лавозимоти касбӣ қарор доранд.

Инчунин дар толори варзишӣ гузаронидани ҷамъомадҳои мунтазами тамринӣ, дарсҳои маҳоратӣ, мусобиқаҳои сатҳҳои гуногун ва барномаҳои таълимӣ, ки ба баланд бардоштани ихтисоси варзишгарон ва ҳайати мураббиён равона карда шудаанд, ба нақша гирифта шудааст.

Намояндаи Федератсияи шамшербозии Тоҷикистон Фарангис Самиева аҳамияти стратегии иншоотро барои омода кардани чемпионҳои оянда таъкид намуда, иброз дошт, ки ифтитоҳи толори варзишии шамшербозӣ ин марҳилаи калидӣ дар таърихи шамшербозии ватанӣ мебошад.

«Самти асоситарини фаъолияти мо ин ҷалби кӯдакону ҷавонон ба ин намуди варзиш аст. Боварии комил дорам, ки шароити фароҳамовардашуда имкон медиҳад, ки на танҳо насли нави шамшербозони истеъдодманд тарбия ёбанд, балки Тоҷикистон дар арсаи байналмилалӣ низ шоиста муаррифӣ карда шавад»,-гуфт Фарангис Самиева.

Ба истифода додани толори варзишии «Шеру Шамшер» дар соли ҷашнӣ нишонаи равшани сиёсати пайгиронаи давлат дар самти таҳкими иқтидори варзишии ҷумҳурӣ ва дастгирии насли нарас мебошад.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон