Муҳаммадризо Маҷидӣ: «Фарҳанг чун яке аз пояҳои муколама ва ҳамдигарфаҳмӣ байни мардуми Осиё хизмат менамояд»

ДУШАНБЕ, 25.09.2026 /АМИТ «Ховар»/. Осиё қораи тамаддуни бузург, забонҳои бостонӣ, фарҳангҳои гуногун ва роҳҳои таърихии муколама байни халқҳо аст. Чунин иброз намуд имрӯз зимни баргузории ҷаласаи Кумитаи доимии Ассамблеяи парламентии Осиё оид ба масъалаҳои иҷтимоӣ ва фарҳангӣ Котиби генералии Ассамблеяи парламентии Осиё Муҳаммадризо Маҷидӣ.

Муҳаммадризо Маҷидӣ иброз дошт, ки барои Ассамблеяи парлумонии Осиё фарҳанг на танҳо масъалаи мерос аст, балки он метавонад ҳамчун яке аз пояҳои муколама, ҳамдигарфаҳмӣ ва ҳамкорӣ байни мардуми Осиё хизмат кунад.

«Зимни ҷаласаи пленарии ахири Ассамблеяи парлумонии Осиё дар шаҳри Манамаи Шоҳигарии Баҳрайн пешниҳод оид ба эълони даҳсолаи муколамаи фарҳангӣ дар Осиё қабул гардид. Ба Котибот супориш дода шуд, ки дар ҳамкории зич бо парлумонҳои кишварҳои аъзои Ассамблея корҳои омодагиро барои амалисозии ин ташаббус анҷом дода, натиҷаи онро ба ҷаласаи навбатӣ пешниҳод намояд»,- афзуд Муҳаммадризо Маҷидӣ.

Котиби генералии Ассамблеяи парламентии Осиё таъкид кард, ки сулҳ танҳо набудани ҷанг нест, балки сулҳ фарҳанг аст. Фарҳанги гуфтугӯ, фарҳанги эҳтиром ба дигарон, фарҳанги гӯш додан пеш аз доварӣ кардан, фарҳанги пазируфтани тафовутҳо ва ҷустуҷӯи роҳҳои ҳал тавассути ҳамкорӣ.

Ворид кардани мафҳуми «фарҳанги об» ба ин нишаст метавонад моро аз доираи идоракунии захираҳои табиӣ берун бурда, ба сӯи баҳси васеътар оид ба фарҳанги масъулиятпазирӣ, фарҳанги истеъмол, фарҳанги ҳифзи захираҳо ва фарҳанги ҳамкорӣ раҳнамун созад.
Муҳаммадризо Маҷидӣ изҳори итминон намуд, ки Котибот бо истифода аз назарҳо, тавсияҳо ва саҳмгузориҳои арзишманд имкони омода кардани пешниҳодҳо ва ҳуҷҷатҳои заруриро барои баррасӣ аз ҷониби мақомоти салоҳиятдори Ассамблеяи парлумонии Осиё (APA) — аз ҷумла дар ҷаласаи навбатии пленарии он пайдо хоҳад кард.

АКС: АМИТ «Ховар»