АЗ ВОДИИ РАШТ ТО ИСКАНДАРКӮЛ. Хатсайрҳои сайёҳии дохилӣ ба минтақаҳои сайёҳии Тоҷикистон анҷом ёфтанд

ДУШАНБЕ, 07.10.2026 /АМИТ «Ховар»/. Силсилахатсайрҳои сайёҳии дохилӣ ба минтақаҳои сайёҳии мамлакат, ки тибқи дастури Раиси шаҳри Душанбе муҳтарам Рустами Эмомалӣ дар рӯзҳои истироҳатӣ ташкил шуда буданд, анҷом ёфтанд. Дар ин хусус ба АМИТ «Ховар» аз шуъбаи иттилоотии дастгоҳи Раиси шаҳри Душанбе хабар доданд.

Силсилахатсайрҳои сайёҳии дохилӣ ба минтақаҳои сайёҳии мамлакат аз моҳи июл то октябр идома ёфтанд. Мақсади он аз рушди соҳаи сайёҳӣ, муаррифии имконияти бойи таърихию фарҳангӣ ва табиии мамлакат, тарғиби тарзи ҳаёти солим ва боз ҳам баланд бардоштани ҳисси ватандӯстӣ ва ифтихори миллӣ иборат буд.

Барномаи хатсайрҳо сафар ба самтҳои Душанбе – Рашт – Нуробод – Душанбе, Душанбе – Балҷувон – Ховалинг – Душанбе, Душанбе – Норак –Душанбе, Душанбе – Ромит – Душанбе, Душанбе – Айнӣ (Искандаркӯл) — Душанбе, Душанбе – Данғара – Восеъ – Кӯлоб – Муъминобод – Душанбе, Душанбе – Роғун – Душанбе ва Душанбе – Ҳисор – Душанберо дар бар гирифт. Зимни сафарҳо иштирокчиён бо имконоти сайёҳӣ, ёдгориҳои таърихию фарҳангӣ, захираҳои табиӣ ва инфрасохтори сайёҳии минтақаҳои гуногуни кишвар аз наздик шинос шуданд.

Ҳамзамон дар доираи ҳар хатсайр ҳамоишҳои маърифатӣ бахшида ба ҷашни 35-солагии Истиқлоли давлатии Ҷумҳурии Тоҷикистон, намоиши филмҳои ватандӯстона, аз ҷумла «Эмомалӣ Раҳмон–Асосгузори давлати навини Тоҷикистон», «Эмомалӣ Раҳмон–ҳомии сулҳ дар ҷаҳон», «Марде аз сарнавишт», дарсҳои омӯзишӣ оид ба рушди соҳаи сайёҳӣ, сабқатҳои экологӣ, иқдомҳои ҳифзи муҳити зист ва чорабиниҳои фарҳангӣ-фароғатӣ ва варзишӣ гузаронида шуданд.

Ин ташаббус ба ташаккули муҳити муосири сайёҳӣ ва баланд бардоштани рақобатнокии маҳсулоти сайёҳии ватанӣ равона гардида, ҳамзамон дар таҳкими робитаҳои фарҳангӣ ва васеъ намудани ҷаҳонбинии кормандон нақши муҳим мебозад.

Татбиқи ин иқдом дар асоси дастури Раиси шаҳри Душанбе ва бо мақсади иҷрои супориши Роҳбари Дастгоҳи иҷроияи Президенти Ҷумҳурии Тоҷикистон оид ба рушди сайёҳии дохилӣ ба роҳ монда шуда, дар доираи он кормандони мақомоти шаҳр бо мавзеъҳои муҳими таърихӣ, фарҳангӣ ва сайёҳии мамлакат шинос шуданд.

АКС: Шуъбаи иттилоотии дастгоҳи Раиси шаҳри Душанбе