Дар Душанбе доир ба Шабакаи иқлимии TajCN ҳамоиш баргузор гардид

ДУШАНБЕ, 08.10.2026 /АМИТ «Ховар»/. Тоҷикистон яке аз нуқтаҳои гарми иқлимии сайёра ва яке аз кишварҳои  осебпазиртарини тағйирёбии иқлим дар минтақаи Аврупо ва Осиёи Марказӣ мебошад. Дар ин замина созмонҳои экологӣ дар мубориза бо тағйирёбии иқлим ва таъсири он нақши муҳим мебозанд, зеро бо ҷомеаҳои осебпазир, деҳқонон, занони деҳот ва ҷавонон ҳамкорӣ мекунанд ва навовариҳою равишҳои ҷомеаро бо баробарии гендерӣ  дастгирӣ мекунанд. Ин нукта дар ҳамоиш доир ба Шабакаи иқлимии созмонҳои ҷамъиятии Тоҷикистон — TajCN  (Tajikistan Climate Network) дар шаҳри Душанбе баён гардид, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Ҳамоиш бо ташаббуси Кумитаи ҳифзи муҳити зисти назди Ҳукумати Ҷумҳурии Тоҷикистон ва Маркази минтақавии экологии Осиёи Марказӣ дар Тоҷикистон баргузор гардид. Мубодилаи таҷриба ва баланд бардоштани огоҳии ҷомеаи шаҳрвандӣ дар масъалаҳои тағйирёбии иқлим яке аз ҳадафҳои асосии Шабакаи иқлимии TajCN мебошад, ки бо ташаббуси ташкилоти ҷамъиятии экологӣ таъсис ёфтааст.

Зимни баргузории муколамаҳои иқлимӣ иштирокчиён музокироти байналмилалии иқлимии дарпешистодаи Конфронси тарафҳои қолабии Созмони Милали Муттаҳидро оид ба тағийёбии иқлим COP31, ки моҳи ноябр дар  Туркия баргузор мегардад, баррасӣ карданд.

Бо назардошти осебпазирии баланди аҳолӣ, заифии экосистемаҳои кӯҳӣ, иқтидори маҳдуди мутобиқшавӣ ва маблағгузории иқлимӣ созмонҳо ва ҷомеаи шаҳрвандӣ аз пешбурди сиёсати пуршиддати иқлимӣ ва иштироки фаъолона дар COP31 пуштибонӣ мекунанд. Ҳамзамон даъват менамоянд, ки ба ҳифзи ҷамоатҳои осебпазир ва масъалаҳои адолати иқлимӣ таваҷҷуҳи махсус зоҳир карда шавад.

АКС: Кумитаи ҳифзи муҳити зисти назди Ҳукумати Ҷумҳуруии Тоҷикистон