Дар нуҳ моҳ иҷрои нақшаи андозҳо ва дигар пардохтҳои ҳатмӣ беш аз 124 фоиз таъмин гардид

ДУШАНБЕ, 21.10.2026 /АМИТ «Ховар»/.  Дар нуҳ моҳи соли 2026 иҷрои нақшаи андозҳо ва дигар пардохтҳои ҳатмӣ ба андозаи 124,4 фоиз таъмин гардид, хабар доданд ба АМИТ «Ховар» аз Кумитаи андози назди Ҳукумати Ҷумҳурии Тоҷикистон.

Аз ҳисоби андозҳо ва дигар пардохтҳои ҳатмӣ ба буҷети давлатӣ 26 миллиарду 600 миллион сомонӣ ворид карда шуд, ки нисбат ба нишондиҳандаҳои пешбинишуда 5 миллиарду 213 миллион сомонӣ зиёд мебошад.

Дар давраи ҳисоботӣ шумораи андозсупорандагоне, ки эъломияҳои худро ба тариқи электронӣ пешниҳод менамоянд, 4,6 ҳазор адад зиёд карда шуд. Дар айни замон ҳамаи субъектҳои хоҷагидори тибқи муқаррароти Кодекси андоз ҳисоботдиҳанда эъломия ва ҳисоботи худро ба мақомоти андоз пурра ба тариқи электронӣ пешниҳод менамоянд. Аз ҷониби Кумитаи андоз тавассути модулҳои барномаи компютерӣ ба шаҳрвандону андозсупорандагон зиёда аз 60 хизматрасонии давлатӣ дар шакли электронӣ ба роҳ монда шудааст.

Дар нуҳ моҳ 5 хизматрасонии электронӣ, аз ҷумла дар шакли автоматӣ тасдиқ гардидани санади муқоисавии хоҷагии деҳқонӣ, портали хизматрасониҳо барои хоҷагиҳои деҳқонӣ, бекоркунии воҳидҳои алоҳидаи шахсони ҳуқуқӣ дар шакли электронӣ ва дигар хизматрасонӣ ба роҳ монда шуд.

Соли 2026 ба истифода додани боз 11 намуд хизматрасонии нави давлатӣ дар шакли электронӣ дар назар дошта шудааст.

АКС: АМИТ «Ховар»