Дар шаҳри Гулистон ҳамоиши байналмилалии геологӣ ва конфронси «Micromine-2026» баргузор гардид
ДУШАНБЕ, 22.10.2026. /АМИТ «Ховар»/. Дар шаҳри Гулистон бо ташаббуси Саридораи геологияи назди Ҳукумати Ҷумҳурии Тоҷикистон таҳти унвони «Нақши геология дар рушди саноати мамлакат» ҳамоиши байналмилалии илмию амалӣ ва Конфронси нуҳуми байналмилалии истифодабарандагони «Майкромайн-2026» баргузор гардид. Дар ин хусус ба АМИТ«Ховар» аз ин саридора хабар доданд.
Дар кори конфронс намояндагон аз сохторҳои давлатӣ, муассисаҳои илмию таълимӣ, корхонаҳои кӯҳкорӣ ва мутахассисон аз нуҳ давлати ҷаҳон – Австралия, Британияи Кабир, Бразилия, Муғулистон, Қазоқистон, Қирғизистон, Узбекистон, Озарбойҷон ва Тоҷикистон иштирок намуданд.
Зимни конфронс иброз гардид, ки дар солҳои истиқлоли давлатӣ соҳаи геология дар омӯзиши сарватҳои зеризаминӣ, иктишофу ҷустуҷӯи канданиҳои фоиданок, инчунин баҳодиҳии иқтидори минералию ашёи хоми мамлакат нақши муҳим гузошт. Захираҳои минералӣ яке аз пойдеворҳои асосии рушди саноати кӯҳкорӣ, металлургия ва дигар соҳаҳои иқтисоди миллӣ ба шумор рафта, омӯзиш ва истифодаи оқилонаи онҳо аҳаммияти стратегӣ дорад.
«Яке аз самтҳои муҳими рушд дар ин соҳа рақамикунонии равандҳои геологӣ мебошад. Истифодаи барномаҳои махсус имкон медиҳад, ки маълумоти геологӣ ба таври муназзам ҷамъоварӣ ва коркард шуда, моделҳои сеченакаи конҳо таҳия гарданд, захираҳои минералӣ баҳо дода шаванд ва корҳои кӯҳкорӣ самараноктар нақшакашӣ карда шаванд»,–иброз дошт Сардори Саридораи геологияи назди Ҳукумати Ҷумҳурии Тоҷикистон Илҳомҷон Оймуҳаммадзода.
Таъкид гардид, ки амалӣ кардани технологияҳои рақамӣ, аз ҷумла барномаи нави «Micromine» имкон медиҳад, ки дақиқии ҳисобҳо баланд бардошта, вақт сарфа ва сифати қарорҳои техникӣ беҳтар карда шавад. Истифодаи зеҳни сунъӣ дар таҳлили геологӣ ва моделсозӣ низ як самти нави рушди соҳа ба шумор меравад.
Баргузории ин чорабинии байналмилалӣ барои табодули таҷрибаи пешқадам, таҳкими робитаҳои касбӣ, омода намудани кадрҳои баландихтисос ва рушди технологияҳои рақамӣ дар соҳаи геологияи Тоҷикистон заминаи мусоид фароҳам меорад.
Ёдовар мешавем, ки кори конфронс пагоҳ низ идома меёбад.
АКС: Саридораи геологияи назди Ҳукумати Ҷумҳурии Тоҷикистон
Даромади буҷети давлатии Тоҷикистон барои соли 2027 80,1 миллиард сомонӣ пешбинӣ шудааст
Дар Душанбе Конфронси байналмилалӣ оид ба зеҳни сунъӣ — AICONF-2026 оғоз гардид
Байни Тоҷикистон ва БАТР ба маблағи беш аз 62 миллион евро созишномаҳои қарзию грантӣ ба имзо расиданд
Пагоҳ ҷаласаи 26-уми Кумитаи роҳбарони воҳидҳои ҳифзи ҳуқуқи Шурои роҳбарони хадамоти гумруки ИДМ баргузор мешавад
Дар Душанбе ҷаласаи 25-уми RILO-Москва баргузор гардид
Муовини Сарвазири Тоҷикистон бо вазъи корҳои саҳроӣ дар ноҳияи Зафаробод шинос шуд
Агентии омор: «Дар Тоҷикистон шумораи субъектҳои хоҷагидор зиёд шудааст»
Дар Панҷакент беш аз 400 километр роҳҳои маҳаллӣ таъмир ва мумфарш карда шуданд
Ҳайати Тоҷикистон дар Машварати сеюми роҳбарони мақомоти зиддикоррупсионии кишварҳои аъзои Созмони ҳамкории исломӣ иштирок намуд
Тағйирёбии иқлим сабаби коҳиш ёфтани ҳосилнокии мева дар Тоҷикистон гардид
Дар Минтақаи озоди иқтисодии «Кӯлоб» бинои нави дидбонгоҳи гумрукӣ ба истифода дода шуд
Дар Душанбе масъалаи татбиқи лоиҳаву барномаҳои муштарак бо намояндаи ЮНИСЕФ баррасӣ гардид
