Ҳиссаи Хатлон дар ҳаҷми умумии маҳсулоти соҳаи кишоварзии Тоҷикистон беш аз 53 фоизро ташкил медиҳад

ДУШАНБЕ, 22.10.2026 /АМИТ «Ховар»/. Ҳаҷми умумии истеҳсоли маҳсулоти кишоварзии Тоҷикистон ба 35,7 миллиард сомонӣ расид, ки нисбат ба ҳамин давраи соли 2025    8,2 фоиз зиёд мебошад. Саҳми асосиро дар ин нишондиҳанда кишоварзони вилояти Хатлон гузоштаанд — ҳиссаи вилоят дар ҳаҷми умумии маҳсулоти соҳаи кишоварзии ҷумҳурӣ 53,3 фоизро ташкил дод. Дар ин хусус АМИТ «Ховар» бо истинод ба хадамоти матбуоти Раиси вилояти Хатлон иттилоъ медиҳад.

Дар ин давра дар ҳама шаклҳои хоҷагидории вилояти Хатлон нишондиҳандаҳои назарраси истеҳсолӣ ба қайд гирифта шуданд. Аз ҷумла, деҳқонони вилоят беш аз 864,2 ҳазор тонна ғалладона, 224 ҳазор тонна картошка, 1,8 миллион тонна сабзавот, 945,6 ҳазор тонна маҳсулоти полезӣ, 378,1 ҳазор тонна мева ва 133 ҳазор тонна ангур ҷамъоварӣ намуданд.

Дар вилоят дар бахши чорводорӣ низ пешравиҳо ба назар мерасанд. Истеҳсоли гӯшт ба 138,8 ҳазор тонна, шир ба 345 ҳазор тонна ва тухм ба 137,6 миллион дона расид. Шумораи чорвои калони шохдор, гӯсфанду буз ва дигар намуди чорво низ афзоиш ёфтааст. Барои таъмини соҳа бо хӯроки чорво 1 миллиону 420,7 ҳазор тонна хӯроки дурушт (масалан, беда, юнучқа ё алафи хушкшуда) ва 22,3 ҳазор тонна хӯроки ширадор захира гардидааст.

Дар вилоят инчунин пилла 40,3 фоиз, сабзавот — 15 фоиз, гӯшт — 12,9 фоиз, мева — 9,2 фоиз, тухм — 8,7 фоиз, ангур — 7,5 фоиз ва картошка 3,7 фоиз ба қайд гирифта шудааст. Ин нишондиҳандаҳо аз рушди босуботи соҳа гувоҳӣ медиҳанд.

АКС аз бойгонӣ