Вазорати нақлиёти Тоҷикистон барои навсозии роҳи «Балҷувон-Сари Хосор» бо ширкати чинӣ қарордод ба имзо расонид

ДУШАНБЕ, 02.11.2026 /АМИТ «Ховар»/. Вазорати нақлиёти Ҷумҳурии Тоҷикистон бо ширкати «Нанҷинг Коммуникейшн Инҷиниринг Компани Лимитед»  оид ба сохтмони роҳи мошингарди «Балҷувон–Сари Хосор» қарордод  ба имзо  расонид, иттилоъ медиҳад АМИТ «Ховар» бо истинод ба ин вазорат.

Ин санадро Вазири нақлиёти Ҷумҳурии Тоҷикистон Азим Иброҳим ва Директори генералии намояндагии ширкати «Nanjing Communication Engineering Company Ltd.» дар Тоҷикистон Биан Донг имзо намуданд. Ҷонибҳо ҳамзамон масъалаҳои бо сатҳу сифати мутобиқ ба стандартҳои байналмилалӣ сохтани роҳи мазкур, сари вақт ва дар муҳлати муқарраргардида ба анҷом расонидани корҳои сохтмониро баррасӣ намуданд.

Азим Иброҳим изҳор намуд, ки роҳи  «Балҷувон – Сари Хосор» дар минтақае бунёд мешавад, ки  аз нигоҳи ҷуғрофӣ тағйирёбанда буда, ҳангоми бориши зиёди барфу борон ва офатҳои табиӣ осебпазир мебошад. Аз ин лиҳоз ҳангоми амалӣ намудани корҳои сохтмонӣ  роҳи мазкур бояд ба хатарҳои эҳтимолии офатҳои табиӣ мутобиқ гардонида шавад. Масофаи роҳ  54,1 км буда, дар доираи он сохтмони 10 пули хурду бузург ва 121 қубури обгузар пешбинӣ шудааст. Лоиҳа дар доираи маблағҳои қарзии Бонки аврупоии таҷдид ва рушд амалӣ карда мешавад.

Ширкати сохтмонии «Communication Engineering Company Limited (NJCE)»-и Чин соли 1987 таъсис шуда, қароргоҳаш дар шаҳри Нанкини музофоти Тзянсу ҷойгир аст. Ширкат дар Тоҷикистон намояндагӣ дорад. Ширкати NJCE дар қаламрави Чин ва кишварҳои ҳамсояи он ба бунёди роҳу пулҳо, нақбҳо,  иншооти  инфрасохторӣ  ва гидротехникӣ  машғул аст. Аз ҷумла, ширкат қаблан дар Тоҷикистон дар татбиқи лоиҳаи барқарорсозии қитъаи роҳи автомобилгарди «Бохтар – Левакант – Оқмазор»  дар баланд бардоштани бехатарии ҳаракат ва нигоҳдории роҳҳо ҳисса гузоштааст.

           АКС: Вазорати нақлиёти Ҷумҳурии Тоҷикистон