Даҳшат: хонандагони мактаби миёна ба ивази маводи мухаддир ҳамсинфи худро ба афғонҳо гарав монданд

Душанбе, 04.02.2016. (АМИТ «Ховар».-Тавре ки аз Кумитаи давлатии амнияти миллии ҷумҳурӣ ба АМИТ «Ховар» иттилоъ доданд, аз ҷониби онҳо Алишери Абдуҳафиз, соли таваллудаш 1998, хонандаи синфи 11, мактаби таҳсилоти миёнаи рақами 11-и деҳаи Ёли ноҳияи Шӯрообод ва Раҳималии Шариф, соли таваллуд 1997, донишҷӯи соли якуми Литсейи касбии хизмат ва туризм, зода ва истиқоматкунандагони деҳаи Ёли ҷамоати ба номи Маҳмудови ноҳияи Шӯрообод бо гумони даст доштан дар муомилоти ғайриқонунии маводи мухаддир дастгир шуданд. Тибқи нишондоди Раҳималии Шариф аз дохили пинҳонгоҳи махсус, воқеъ дар мавзеи «Дашти ришқа»-и деҳаи Ёли ноҳияи Шӯрообод се халта маводи мухаддир бо 55 бастаи дорои бӯйи махсус ошкор карда шуд. Зимни пурсиши дастгиршудагон маълум гардид, ки онҳо бо қочоқчии афғон Назрихудо валади Паҳлавондарё созиши ҷиноятӣ баста, бар ивази маводи мухаддир рафиқ ва ҳамдеҳаи худ Аҳмадшоҳ Шеровро (соли таваллудаш 1997) ба нашъаҷаллобони афғон ба гарав гузоштаанд.
Кормандони КДАМ бо баргузор намудани амалиёти махсус Аҳмадшоҳ Шеровро аз асорати гурӯҳи қочоқчиёни афғон таҳти роҳбарии Назрихудо валади Паҳлавондарё озод карда, ба Ватан баргардониданд.
Ташхиси минбаъда муайян кард, ки маводи мухаддири аз Раҳималии Шариф мусодирашуда 17 килограмм афюн ва 15 ҳашиш буда, вазни умумии онҳо 32 кило мебошад.
Ҳоло нисбат ба Раҳималии Шариф ва Аҳмадшоҳ Шеров, бо дастрасии моддаҳои 335, 200, 165 ва нисбат ба Алишери Абдуҳафиз бо дастрасии моддаи 200, нисбат ба шаҳрванди Афғонистон Назрихудо валади Паҳлавондарё бо дастрасии моддаҳои 335, 289 ва 200 Кодекси ҷиноятии Ҷумҳурии Тоҷикистон парвандаҳои ҷиноятӣ оғоз шуда, тафтиш идома дорад.
Дар мисоли ҳодисаи нангини ба хариду фурӯши ғайриқонунии маводи мухаддир даст задани наврасону ҷавонони ноҳияи Шӯрообод Раҳималии Шариф, Алишери Абдуҳафиз, Аҳмадшоҳ Шеров ва дигар наврасону ҷавонони ноболиғ метавон хулоса бардошт, ки нақши волидайн ва мактабу муаллимон дар таълиму тарбияи насли наврас ҳанӯз ҳам ҷавобгӯи талабот нест. Ба ибораи дигар дар ноҳияи Шӯрообод Қонуни ҶТ “Дар бораи масъулияти падару модар дар таълиму тарбияи фарзанд” риоя намешавад.
Дар робита ба ин қазия зарур аст, ки шуъбаҳои маориф ва кор бо ҷавонон, варзиш ва сайёҳии ноҳияи Шӯрообод дар самти истифодаи неруи зеҳниву ақлонии насли ҷавон ва раванди худшиносии онҳо ташаббусро ба даст гиранд. Ҳамчунин аз тамоми роҳбарони муассисаҳои таълимӣ, ҷомеаи шаҳрвандӣ, ташкилоту созмонҳои ҷамъиятӣ, падару модарон хоҳиш карда мешавад, ки ба сохторҳои қудратӣ ва мақомоти ҳифзи ҳуқуқ дар пешгирию решакан сохтани ҷинояткорӣ дар ҷомеа кумак расонанд.