Дар Душанбе Форуми байналмилалии сармоягузории «Душанбе-2016» оғоз шуд

Октябрь 14, 2016 09:42

Душанбе, 14.10.2016 /АМИТ «Ховар»/. Дар ин лаҳзаҳо дар Китобхонаи миллии Тоҷикистон Форуми байналмилалии сармоягузории «Душанбе-2016» дар доираи Рӯзи соҳибкор, ки ҳамасола 14 октябр дар мамлакат ҷашн гирифта мешавад, ба кори худ оғоз кард. Пеш аз оғози форум меҳмонон аз намоишгоҳи молу маҳсулоти соҳибкорони ватанӣ дидан намуданд.
Дар назар аст, ки Сарвазири Ҷумҳурии Тоҷикистон Қоҳир Расулзода бо сухани ифтитоҳӣ ба кори форум оғоз бахшад. Дар форум намояндагони воломақоми созмонҳои байналмилалии молиявӣ суханронӣ хоҳанд кард.
Сипас иштирокчиёни форум дар масъалаи «Сиёсати иқтисодии ба сармоягузорӣ асосёфта. Имкониятҳои минтақаҳои озоди иқтисодӣ дар рушди иқтисодиёт» баромад мекунанд. Дар ин бахш мавзӯъҳои «Стратегияи миллии рушди Ҷумҳурии Тоҷикистон барои давраи то соли 2030», «Саҳми бахши хусусӣ барои ноилшавӣ ба ҳадафҳои стратегӣ», «Имкониятҳои минтақаҳои озоди иқтисодӣ (МОИ) дар рушди истеҳсолот», «Имтиёзҳо ва инфрасохтори МОИ ва дурнамои рушди МОИ» ва дигар мавзўҳои марбут ба МОИ матраҳ мегарданд.
Дар ин бахш Умед Давлатзод, муовини вазири рушди иқтисод ва савдои Ҷумҳурии Тоҷикистон, Нигина Анварӣ, муовини раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Кристофер Миллер, роҳбари лоиҳаи минтақавии «Таҷрибаи глобалӣ оид ба савдо ва рақобатпазирӣ», Гурӯҳи Бонки ҷаҳонӣ, Туула Юрёля, роҳбари Намояндагии САҲА дар Тоҷикистон, Шафқатхонум Ализода, директори минтақавии ташкилоти ОКСФАМ, Руанг Бандзюн, роҳбари ҶДММ «Ауфен», МОИ «Данғара» ва дигарон маърӯза мекунанд.
Мавзӯи бахши дуюми форум «Воридотивазкунӣ — имконияти нави соҳибкориву сармоягузорӣ дар Тоҷикистон» мебошад. Қодири Қосим, раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Ҷамшед Нурмаҳмадзода, раиси Бонки миллии Тоҷикистон, Мирзо Саидов, директори ҶДММ «Коргоҳи дӯзандагӣ»-и шаҳри Қӯрғонтеппа, Алекс Плеханов, муовини директор оид ба тадқиқоти Бонки аврупоии таҷдид ва рушд, Антонио Фанелли, мушовири калон оид ба соҳибкорӣ ва сиёсати корхонаҳои хурду миёна, Созмони ҳамкории иқтисодӣ ва рушд, Роман Черемисин, роҳбари ҶСП «Объединенные водные технологии» аз Ҷумҳурии Қазоқистон ва дигар намояндагон дар масъалаи сиёсат ва имкониятҳои воридотивазкунӣ, заминаи қонунгузории соҳа, густариши истеҳсоли маҳсулоти рақобатпазири воридотивазкунанда, пайдо намудани бозорҳои нав барои содироти маҳсулоти ватанӣ ва имтиёзҳои мавҷуда барои истеҳсоли махсулоти ватанӣ андешаҳояшонро баён медоранд.
Мавзӯи бахши сеюми форум ба масъалаи «Ба даст овардани истиқлолияти энергетикӣ — заминаи рушди истеҳсолоти миллӣ» бахшида шудааст.
Дар фарҷоми кори форум санадҳои ҳамкорӣ ба имзо расонида мешаванд. Дар назар аст, ки иштирокчиён инчунин изҳороти Форумро қабул кунанд.

Октябрь 14, 2016 09:42

Хабарҳои дигари ин бахш

ИСТИФОДАИ САМАРАНОКИ ЗАМИН. Сокинони шаҳри Бохтар дар замини наздиҳавлигияшон гармхона ташкил намуданд
Ба соҳибкори муваффақи тоҷик аз ҷониби Президенти Қазоқистон Медали ҷашнӣ ва Ифтихорномаи фахрӣ супорида шуд
Дар Хатлон нахустин бозиҳои мусобиқаи кӯдаконаи футбол баргузор шуданд
НАҚЛИЁТИ «САБЗ». Ба Тоҷикистон 6047 мошини барқӣ ворид карда шудааст
Кӯчати мағзи устухон дар ҳолати саратони хун ва бемориҳои гематологӣ дар шабакаи клиникаҳои «Acıbadem»
Имрӯз дар шаҳри Душанбе ҳаво то 31 дараҷа гарм мешавад
Барои барқарор намудани чарогоҳҳои водии Рашт 20 намуди тухмиҳои бутта ва дарахтон парвариш карда мешаванд
Дар Ҳисор маҳфил – озмуни «Тоҷикистони ман!» оғоз гардид
Имсол дар Хатлон қариб 500 ҳазор тонна пиёз ҷамъоварӣ карда мешавад
Дар шаҳраки Обшорони ноҳияи Мастчоҳ татбиқи лоиҳаи обрасонӣ оғоз ёфт
Имрӯз дар водиҳои Тоҷикистон ҳаво то 34 дараҷа гарм мешавад
ҲАФТАИ ИЛМ – 2025. Донишгоҳи байналмилалии сайёҳӣ ва соҳибкории Тоҷикистон аз муҳимтарин дастовардҳо натиҷагирӣ намуд