ОҚИБАТИ ФАЛОКАТҲОИ НАҚЛИЁТ

Душанбе, 4 июл. (АМИТ «Ховар», Мавҷуда Давлатзода).- 3 июл дар ҷумҳурӣ дар натиҷаи фалокатҳои роҳу нақлиёти ба қайд гирифташуда 7 нафар ҳалок ва 12 нафар маҷрӯҳ шуд. Тибқи хабари Раёсати назорати давлатии автомобилии ВКД ҷумҳурӣ ҳамон рӯз дар километри 30 — юми роҳи мошингарди Душанбе — Қӯрғонтеппа дар ағбаи Фахробод корманди Агентии назорати маводи нашъадори ҷумҳурӣ Сафар Бобоев ҳалок шуд. Ӯ дар ҳудуди учаскаи Киров мошинро идора карда натавонист, дар натиҷа мошин ба ҷарӣ афтод. Худи ронанда ва ҳамсафари ӯ Холмоҳ Файзуллоеваи 51 сола дар ҷойи воқеа ҳалок шуданд. Қайд карда мешавад, ки С.Бобоев сардори шӯъбаи дуюми раёсати зудамали ҷустуҷӯи Агентии назорати маводи нашъадори назди Президенти ҷумҳурӣ шуда кор мекард.