ФАЛОКАТИ НАҚЛИЁТ ДАР РОҲИ МОШИНГАРДИ ДУШАНБЕ – ДАНҒАРА — КӮЛОБ

    26 август. (АМИТ «Ховар»,  Темур  Бандишоев). – Аз  Раёсати  бозрасии  давлатии  автомобили  ҷумҳурӣ  ба  АМИТ «Ховар»  хабар  доданд, ки  дирӯз  бар  асари  як  фалокати нақлиёт  дар  роҳи  мошингарди  Душанбе – Данғара — Кӯлоб  10  нафар   ҳалок  шуд. Хабар  дода  мешавад, ки  25  август соати  14 – у  25  дақиқа ронандаи  мошини  сабукрави  «Дайво» Маҳмадалӣ  Раҳматови 27 – сола  дар  километри  132 –юми  роҳи  мазкур  бо  сабабҳои  номаълум  мошинро   идора  карда  натавонист ва  ба  хати  ҳаракати  муқобил  баромад. Дар  натиҷа  мошини  ӯ  бо  мошини  сабукрави  «Жигули» бархӯрд,  ки  онро  сокини  44 — солаи   ноҳияи  Фархор  Қадамшоҳ  Шарифов  идора  мекард.             Бар  асари ин  фалокат  ҳар  ду  ронанда  ва  8  мусофири дигар  ҳалок  шуданд. 2  нафари онҳо  бачагони  хурдсол  мебошанд.  Ду  мусофир  бо  ҷароҳатҳои  вазнин  ба  шифохона  фиристода  шуданд.             Фалокати  дигар  дар  ноҳияи  Рӯдакӣ  рух  дод. Ронандаи  мошини   сабукрави  «Нексия»  Шӯҳрат  Раҳмонови  21 – сола  дар  кӯчаи  Ҷавонии  деҳкадаи   Сомониён  ҳаракат  карда,  3  пиёдагарди  навраси  солҳои таваллудашон  1992 ва  1993 – ро пахш  кард. Ду  нафари онҳо дар  ҷои  воқеа  ҳалок  шуданд,  нафари  сеюм  ба  шифохона  фиристода шуд.           Кормандони  Бозрасии давлатии  автомобил  ин  воқеаҳоро  тафтиш  мекунанд.