ХАТИ ҲАРАКАТИ НАҚЛИЁТ РӮЗҲОИ МУЛОҚОТИ СҲШ ТАҒЙИР ДОДА МЕША

Душанбе, 27 август. (АМИТ «Ховар», Мавзуна Бойева).- Аз дафтари матбуоти Вазорати корҳои дохилӣ ба АМИТ «Ховар» хабар доданд, ки рӯзҳои мулоқоти сарони давлатҳои аъзои Созмони ҳамкории Шанхай дар шаҳри Душанбе хати ҳаракати нақлиёт дар вақтҳои муайян тағйир дода мешавад. Тағйироти хати ҳаракати нақлиёт, ғайр аз нақлиёти ҷамъиятӣ, яъне автобусҳо ва троллейбусҳо дар пойтахт то 29 август давом мекунад. Дар давоми ин рӯзҳо ҳаракати нақлиёт, аз ҷумла дар кӯчаҳои Аҳмади Дониш, Айнӣ, хиёбони Рӯдакӣ, аз хиёбони Рӯдакӣ то километри 42- юми роҳи мошингарди Душанбе- Хуҷанд- деҳаи Ҳушёрии ноҳияи Варзоб, кӯчаи Низомии Ганҷавӣ, хиёбони Исмоили Сомонӣ, кӯчаҳои Горкий, Саъдии Шерозӣ, Неъмат Қарабоев, Шестопалов ва Борбад дар вақтҳои гуногун боздошта мешавад. Дар Вазорати корҳои дохилӣ таъкид карданд, ки ронандагони воситаҳои нақлиёт, хусусан нақлиёти транзитӣ дар давоми ин рӯзҳо дар кӯчаҳои Ҳофизи Шерозӣ, Карамов, Умари Хайём, Турсунзода, Дӯстии халқҳо, Бухоро, Сино, Бобоҷон Ғафуров, Ҷаббор Расулов, Абай, Ҷомӣ, 50 — солагии Тоҷикистон, Қаҳҳоров ва роҳи мошингарди колхози «Русия» ҳаракат карда метавонанд.