ХУ СЗИНТАО БА ДУШАНБЕ ОМАД

Ӯро дар майдони ҳавоии пойтахт Президенти Ҷумҳурии Тоҷикистон Эмомалӣ Раҳмон ва шахсони дигари расмӣ пешвоз гирифтанд. Мухбири АМИТ «Ховар» хабар медиҳад, ки Президенти Ҷумҳурӣ Эмомалӣ Раҳмон имрӯз бо раиси Ҷумҳурии Мардумии Чин мулоқот мекунад. Сипас гуфтушуниди ҳайатҳои расмии ҳар ду давлат ва маросими имзои ҳуҷҷатҳои ҳамкорӣ баргузор мегарданд. Ху Сзинтао ва Эмомалӣ Раҳмон баъди имзои ҳуҷҷатҳо дар назди намояндагони воситаҳои ахбори оммавӣ изҳорот медиҳанд. Раиси давлати Чин баъдан бо раисони ҳар ду палатаи парлумони Тоҷикистон ва сарвазири мамлакат мулоқот хоҳад кард. Ху Сзинтао дар ҷараёни сафар дар маҷлиси ҳаштуми Шӯрои сарони давлатҳои аъзои Созмони ҳамкории Шанхай иштирок менамояд, ки 28 август кушода мешавад. Хабар дода мешавад, ки раиси давлати Чин аз Ҷумҳурии Куриё ба Душанбе омадааст.