МУЛОҚОТ ДАР АРАФАИ МАҶЛИСИ ШӮРОИ ТИҶОРАТИИ СҲШ

                 Душанбе,    25 август. (АМИТ «Ховар», Ибодат  Давлатова). – Раиси Палатаи  савдо  ва  саноати  ҷумҳурӣ  Шариф  Саид  дирӯз  бо  раиси  Палатаи  савдо ва  саноати  ҷумҳурии  Қирғизистон,  раиси  Шӯрои  роҳбарони  палатаҳои  савдо ва  саноати  ИДМ Борис  Перфилев  мулоқот  кард, ки  барои иштирок дар  маҷлиси  Шӯрои тиҷоратии  СҲШ  ба  Душанбе омадааст. Зимни  мулоқот  масъалаҳои  густариши  ҳамкорӣ  дар  доираи  Шӯрои  палатаҳои  ИДМ ва  Шӯрои  тиҷоратии  СҲШ,  равнақу  ривоҷи  муносибатҳои  тиҷоратию  иқтисодии  Тоҷикистону  Қирғизистон,  ташкили  намоишгоҳҳои  муштарак  ва  ғайра  муҳокима  шуданд.              Бояд  гуфт, ки  фасли  тобистони  соли  оянда  дар  шаҳри  Бишкек  маҷлиси  навбатии  Шӯрои  роҳбарони  палатаҳои  савдо ва  саноати  ИДМ  баргузор  мегардад. Иштирокчиёни он  имкониятҳои  ҳамкории  минбаъдаро  баррасӣ  менамоянд. Ш.Саид  ва  Б.Перфилев  паймон  карданд, ки  соли  2009  дар   шаҳрҳои  Душанбе  ва  Бишкек  мулоқоти  тоҷирону  соҳибкорони  ҳар  ду  мамлакатро  баргузор  созанд.