САФАРИ РАСМИИ ПРЕЗИДЕНТИ РУСИЯ ДМИТРИЙ МЕДВЕДЕВ БА ТОҶИКИСТОН ОҒОЗ ЁФТ

Душанбе, 29 август. (АМИТ «Ховар», Бекназари Абӯбакр). – Субҳи имрӯз, 29 август сафари расмии Президенти Федератсияи Русия Дмитрий Медведев ба Ҷумҳурии Тоҷикистон бо маросими гулгузорӣ дар пояи муҷассамаи Исмоили Сомонӣ оғоз гардид. Меҳмони олиқадрро муовини аввали вазири корҳои хориҷии Тоҷикистон Абдулло Юлдошев ва шахсони дигари расмӣ ҳамроҳӣ намуданд. Пас аз маросими гулгузорӣ ва зиёрати муҷассамаи асосгузори давлати тоҷикон Исмоили Сомонӣ сурудҳои миллии Тоҷикистону Русия садо доданд. Мухбири АМИТ «Ховар» хабар медиҳад, ки баъди маросими гулгузорӣ Президенти Ҷумҳурии Тоҷикистон Эмомалӣ Раҳмон Президенти Федератсияи Русия Дмитрий Медведевро дар назди Қасри Миллат расман истиқбол гирифт. Баъди ин мулоқоти якка ба яккаи Эмомалӣ Раҳмон ва Дмитрий Медведов ва гуфтушуниди ҳайатҳои расмии ҳарду кишвар баргузор мегардад.