ТАҶЛИЛИ ИДИ ИСТИҚЛОЛИЯТИ АФҒОНИСТОН

89 сол пеш дар ҳамин рӯз шоҳи Афғонистон Амонуллохон баъди ба охир расидани ҷанги сеюми Британияи Кабир ва Афғонистон мустақилияти мамлакатро эълон карда буд. Мақомоти Афғонистон имсол бо назардошти таъмини амният маҳалли гузаронидани тадбирҳои ботантанаро ба шарафи ид комилан махфӣ нигоҳ доштанд. Баъди гузаштанаи тантанаҳои идона маълум шуд, ки онҳо дар қасри Президент — Арк баргузор гардидаанд. Мухбири АМИТ «Ховар» хабар медиҳад, ки Президенти Тоҷикистон Эмомалӣ Раҳмон ба муносибати Иди истиқлолияти Афғонистон ба унвони Ҳамид Карзай барқияи шодбош фиристод. Дар он гуфта мешавад, ки Ҷумҳурии Тоҷикистон ҷонибдори рушди ҳамаҷонибаи муносибатҳои дӯстона, ҳамкории мутақобилан муфид ва ҳусни ҳамҷавории ҳар ду мамлакати ҳамсоя мебошад.