ВАЗИРИ МАОРИФ ЗАРУРАТИ БЕҲТАР НАМУДАНИ СИФАТИ ТАЪЛИМРО ТАЪКИД НАМУД

Зимни мулоқот масъалаҳои тайёрии омӯзишгоҳҳо ва литсейҳо ба соли нави таҳсил, давраи тирамоҳу зимистон, бо кадрҳои варзида таъмин кардани мактабҳо ва ғайра муҳокима шуданд. Роҳбарони мактабҳо ҳисобот доданд, ки то имрӯз қариб ҳамаи омӯзишгоҳҳо ва литсейҳо тармим карда ва бо сӯзишворӣ, аз ҷумла ангишту ҳезум таъмин карда шудаанд. Вазир зарурати беҳтар сохтани сифати таълиму тадрис ва амалӣ сохтани барномаи миллии таҳсилоти миёнаро таъкид намуд. Бо ҷараёни ба эътидол омадани вазъи иқтисодӣ ва беҳтар гардидани шароити зиндагӣ талабот ба беҳтар намудани сифати таҳсил дучанд меафзояд, гуфт вазир. Мудири шӯъбаи маълумоти ибтидоии касбию техникии вилоят Аҳмадҷон Солеҳҷонов ба мухбири АМИТ «Ховар» хабар дод, ки ҳоло дар вилояти Суғд 23 мактаби ҳунаромӯзӣ, аз ҷумла 9 литсей ва 14 омӯзишгоҳ фаъолият доранд. Дар онҳо 6865 талаба 36 касбу ҳунарро меомӯзад.