ҲУНАРПЕШАГОНИ ТОҶИК «ПАНҶ ЗАНИ ХОҶА НАСРИДДИН» — РО БА ЛВОВ МЕБАРАНД

Душанбе, 22 сентябр. (АМИТ «Ховар», Тахмина Ғоибназарова).-Театри драммавии ба номи В.Маяковский дар ҷашнвораи театрҳои Аврупо ширкат меварзад, ки таҳти унвони «Шери заррин» аз 8 то 20 октябр дар шаҳри Лвов баргузор мегардад. Ҳунарпешагони тоҷик дар ин ҷо асари саҳнавии «Панҷ зани Хоҷа Насриддин» — ро намоиш медиҳанд, ки онро коргардон О.Салимов ба саҳна гузоштааст. Мухбири АМИТ «Ховар» ёдовар мешавад, ки асари саҳнавии мазкур дар озмунҳо ва ҷашнвораҳои байналхалқӣ дар шаҳрҳои Санкт- Петербург ва Брест пешкаши тамошобинон гардонида, сазовори ҷоизаҳо гардида буд. Директори театр Сӯҳроб Мирзоев умедвор аст, ки асари саҳнавии мазкур ин дафъа ҳам сазовори баҳои баланди ҳайати доварон ва тамошобинон мегардад.