ҶАМЪОВАРИИ ҒАЛЛАДОНА ДАВОМ ДОРАД

Душанбе, 17 сентябр. (АМИТ «Ховар», Лаззат Диловарзод).- Бино ба маълумоти фаврии Вазорати кишоварзӣ дар ҷумҳурӣ ҷамъоварии ғалла ба 389377 тонна расонида шудааст. Боиси тазаккур аст, ки соли ҷорӣ дар майдони 292480 гектар зироатҳои ғалладонагӣ кишт карда шудааст. То 15 сентябр масоҳати 226576 гектар даравида шуда, 215408 гектари он кӯфта шудааст, ки ин дар муқоиса нисбат ба ҳамин давраи соли 2007 1 ҳазору 710 гектар зиёд аст. Ҳосилнокии заминҳо соли ҷорӣ беҳтар гардид. Аз ҳар як гектар ба ҳисоби миёна 18,1 сентнерӣ ҳосил ба даст оварда шудааст, ки ин нисбат ба ҳамин давраи соли гузашта 0,6 сентнерӣ зиёд аст. Хоҷагиҳои ҷамъиятӣ ва деҳқонӣ (фермерӣ) нисбат ба соли гузашта 15759 тонна ғалла бештар ба даст оварданд.