БОЗОРҲОИ ҶУМҲУРӢ БО КАРТОШКА ТАЪМИН МЕГАРДАНД

Душанбе, 16 сентябр, (АМИТ «Ховар», Лаззат Диловарзод).- Бино ба маълумоти фаврии Раёсати кишоварзии ҷумҳурӣ то 15 сентябр дар ҳамаи шаклҳои хоҷагидорӣ аз масоҳати 2 464 гектар картошка кофта гирифта шудааст. Боиси ёдоварист, ки соли ҷорӣ дар масоҳати 9 ҳазору 623 гектар навъҳои беҳтарини картошка шинонида шудааст. То имрӯз дар ҷумҳурӣ 52 ҳазору 878 тонна картошка истеҳсол ва ба бозорҳои ҷумҳурӣ ворид шудааст, ки ин баробари 25 фоизи иҷрои нақшаи солона мебошад. Тибқи нақшаи пешбинишуда, соли ҷорӣ истеҳсоли картошка ба 212 ҳазору 931 тонна расонида мешавад. Истеҳсоли ин миқдор картошка имконият медиҳад, ки аҳолии ҷумҳурӣ дар фасли тирамоҳу зимистони соли 2008-2009 пурра бо картошка таъмин карда шавад.