ИЗҲОРОТИ ВАЗИРОНИ КОРҲОИ ХОРИҶИИ МАМЛАКАТҲОИ АЪЗОИ СААД

Маскав, 5 сентябр. (АМИТ «Ховар», Ҳалима Хушқадамова). – Вазирони корҳои хориҷии мамлакатҳои аъзои Созмони аҳдномаи амнияти дастаҷамъӣ дар Маскав вобаста ба вазъияти минтақаи Қафқоз ва таҷовузи Гурҷистон ба муқобили Иристони Ҷанубӣ изҳорот қабул карданд. Дар изҳорот вобаста ба ин масъала изҳори ташвиши ҷиддӣ карда мешавад. Вазирони корҳои хориҷӣ изҳор намуданд, ки таҷовузи Гурҷистон ба муқобили Иристони Ҷанубӣ сабаби ҳалокати теъдоди зиёди сокинони маҳаллӣ, аскарону афсарони ҳомии сулҳи Русия ва фоҷиаи бузурги гуманитарӣ гардид. Воқеаҳои минтақаи Қафқоз нишон доданд, ки истифода бурдани меъёрҳои дугона дар соҳаи сиёсат хавфи калон дорад. Дар изҳорот ҳамаи мамлакатҳо даъват карда мешаванд, ки вазъияти ба амал омадаро оқилона муҳокима карда, аз истифодаи зӯрӣ даст кашанд ва проблемаҳои мавҷударо бо роҳҳои мусолиматомез ҳал кунанд. Вазирони корҳои хориҷӣ нақши фаъолонаи Русияро дар мусоидат ва барқарор сохтани сулҳу осоиш дар Қафқоз мувофиқи Оинномаи СММ ва ҳуҷҷати хотимавии Хелсинки, инчунин санадҳои дигари байналхалқӣ дастгирӣ намуданд.