КОРХОНАИ ПАХТАТОЗАКУНИИ КӮЛОБ БА КОР ШУРӮЪ КАРД

Кӯлоб, 15 сентябр. (АМИТ «Ховар», С. Холов ). – Ҷамъияти cаҳомии «Пахтаи Кӯлоб» ба коркарди пахтаи имсола шурӯъ намуд. Директори он Лашкарӣ Мирзоев зимни сӯҳбат бо мухбири АМИТ «Ховар» зикр кард, ки аз рӯзҳои аввали оғози ҷамъоварии пахта дар корхона бештар аз 1500 тонна пахта захира карда шуд. Ҳоло коргарони корхона дар ду навбат кор мекунанд. Маъмурияти корхона қабл аз оғози мавсими пахтачинӣ бо 40 хоҷагии пахтакори минтақаи Кӯлоб шартнома имзо кард. Корхона метавонад дар як шабонарӯз 140 тонна пахтаро тоза кунад. Вале айни ҳол нарасидани оби техникӣ ба пешрафти кор халал мерасонад. Тибқи нақша имсол дар корхона 10 ҳазор тонна пахта тоза карда хоҳад шуд.